International Trade Initiative Forum (ITIF), Mizoramin dan pangaia Zokhawthar Land Custom Station (LCS) kaltlanga ramri insumdawn tawnna a kal thuai theihna turin hma la turin larsap an ngen.
ITIF hruaitute chuan nimin khan Larsap Hari Babu Kambhampati chu Raj Bhavan-ah an kawm a, Zokhawthar LCS kaltlanga ramri insumdawn tawnna chu hun eng emaw chen a chawlh titih tawh chungchanga prime minister hnenah memorandum an thehluh tawh thute an hrilh a, larsap hnenah hian hemi kawnga hma lakpui turin ngenna an thehlut bawk.
An inkawmnaah hian larsap chuan tuna Indo-Myanmar Border trade pangngai taka a kal theih loh chhante lo zirchian a tum thu leh a \ul anga hmalak a tum thu a sawi a, India sorkar chuan a \henawm ram nena insumdawn tawn leh inlaichinna \ha tak neih chu a duh dan a nih thute, ramri insumdawnna chu a ngai pawimawh ngei ngei dawn tih a sawi.
LCS chungchangah sumdawngte leh ITIF Mizoram chu inhmuhkhawm thuai se, helai hmuna sumdawnna kalpui harsa an tih chhante hriat chiana sumdawnna kalpui duh engzah nge awm tih thlengin hriat hmasak ni se \ha a tih thu larsap chuan a sawi a, Zokhawthar hmuna sumdawng duhte leh an harsatna chiang zawka hriat a nih hunah Ministry of Commerce leh central sorkara thuneitu sang zawkte pawh dawr a tum tih a sawi.
ITIF Mizoram hruaitute hian kum 2015 leh tun inkarah Zokhawtharah hian mumal tak leh dan anga sumdawnna kalpui a nih lo thu sawiin, hei hi chhan hrang hrang a awm thu leh helai hmunah hian dan anga sumdawnna kalpui a nih tak loh hnuah sorkar phal loh thil tawlh nan leh dan kalh a insumdawn tawnna hmun a chang ta nia an hriat thu larsap hi an hrilh.
LCS-in a ken tel tam tak, ran rualte hriselna enchian hmaa khung kawmna hmun, ei tur thianghlim dan endikna laboratory, weighbridge, warehouse leh thil dangte a la awm lo a, helai hmun enkawltu tur thawktu pawh an awm mang loh thute an sawi a, bungraw inhlan chhawn dawna tangka fai aia hman \hin, letter of credit, bungraw thawn chhuahna hmun chhinchhiahna – Country of Origin Labelling (COOL) leh insumdawn tawnna hmuna mamawh thil pawimawh zual chungchangah harsatna tam tak a awm thute an sawi bawk a ni.