aIZAWL: Champhai Bawrhsap James Lalrin- chhana leh Line department hotu ten nimin khan Myanmar buaina avanga Mizorama raltlan, Mual- kawi leh Zokhawthara awm te harsatna leh mamawhte an enfiah.
Bawrhsap leh deptt. hotute chuan Mualkawi leh Zokhawthar VC leh tlawmngai pawl hruaitute pawh kawmin, Ei leh bar, eng, tui, nitin mamawh, zirna, hriselna, sumdawn- na hmunhma, security dinhmun leh tul dangte an sawiho a. Hmalak theih dan turte an sawiho.
Champhai bawrhsap chuan “Thenawm ram buai avanga raltlanin engtia rei nge a awh dawn tih hriat a nih loh avangin fur ruahtui tlak leh a nghawng theihte pawh ngaihtuah tel a tul” a ti a. Raltlan buaipui kawnga YMA, khawtlang mipui, kohhran leh mi inphalte hnathawh chhuanawm a tih thu a sawi.
Raltlan chungchang chauh ni lo Zokhawthar himna leh hmasawnna rahbi zawh zel dan tur pawh ngaihtuah tel a nih thu Bawrhsap chuan a sawi a. “Raltlan hmingpua lo kal, kan ram tichhe theite dan hnuaiah nasa taka kan do tlan a ngai a, kan ram leh hnam humhim nan theihtawp kan chhuah tlan a tul” a ti bawk.
Champhai SP Lalrinpuia Varte pawhin ramri dep khua ten raltlan an lo dawnsawn leh buaipui dan fakin, raltlan zinga naupang te dikna leh chanvo humhimte, humsual an dailohna tur leh dan lova thil tih thin laka an fihlim theihna tura zirtirna pek tam a tul thu a sawi a. Raltlante chu India dan te tha taka zawm tur leh bungraw lakluh phallohte lalut lo tura zirtir an pawimawh thu a sawi.
Chief medical officer, Champhai Dr. R. Lianmawia’n hri laka himna tura fimkhur chhunzawm zel a tul thu sawiin, dam- lo an awm chuan Health department thawktute hrilh thuai thin turin a chah a. Covid vaccine lak ngaipawimawha la vek turin a chah.
CMO chuan kum 2013 August atanga kalpui tan cross-border vaccination programme atangin ramri kana lo kal naupang kum 5 hnuailam mi 3000 chuangte zeng hri danna oral polio vaccine pek an nih tawh thu a sawi bawk.
Zokhawthar VCP Lalmuanpuia’n a sawi danin, Zokhawtharah raltlan 4000 chuang hret, chhungkaw 800 vel an awm mek a, Mualkawi-a refugee camp-ah raltlan 150, chhungkaw 40 vel an awm mek thu Chin Youth Oraganization, Champhai (CYOC) hotu ten an sawi.
Champhai bawrhsap pisa-in a chhinchhiah danin, Champhai district-ah raltlan mi 8747 an awm mek a, mi 8601 te chanchin kimchang lakfel tawh niin, mi 8588 te hnenah ID Card pekchhuah tawh a ni a. Relief camp 33 awmin, Relief camp-ah te hian mi 2434 an awm a, Relief camp ni lo hmundanga awm 6313 an tling tawh a, raltlante tan dan leh hrai inzirtirna hun buatsaih thin a ni bawk.