Russian indo lawng lian, Nilainia a chhunga thil puak avanga chhia chu a pil ta tih an ram defence ministry chuan a puang.
Black Sea-a an lawng rual dah zinga pa chan chang, Moskva hi lawngchawlhna lamah hnuh a nih mek laiin tuipui phul nasa lutuk avangin a pil tih ministry chuan a sawi.
Thawktu pawh mi 510 zet phur tel lawng hi Russia sipai chakna hnar pakhat niin Ukraine an rûn mekah pawh tuipui atanga an chetnaa a hmahruaitu ber a ni.
Kyiv chuan missile hmangin lawng hi an kap fuh niin an sawi a. Moscow erawh chuan eng beihna mah a tawn loh thu leh a kan hnuah a pil ta niin an sawi thung.
Kangmei chhuak hian lawnga ralthuam an dahna a tipuak niin Russia chuan a sawi a, thawktu zawng zawngte chu Black Sea thova Russian lawng dangte hmanga thiar chhuah an nih thu a sawi bawk.
Russian defence ministry hian Ningani zan tlai tawh takah khan Moskva an chân thu an puang.
Tonne 12,490-a rit lawng hi Indopui II-na hnu lama Russian lawng pil lian ber a ni.
“Vaukam lama hnuh a nih mek laiin lawng hian a kan avanga a ralthuam phurh a puah avang chhe nasain a inbuktawkna a hloh va, tui a lo phul nasa bawk si a, a pil ta a ni,” tiin Russian defence ministry chuan a sawi.
Ukrainian sipai thuneitute chuan Moskva hi Ukrainian siam Neptune missile hmanga kah a nih thu an sawi a. Neptune hi kum 2014-a Russia-in Crimea a lak hnu leh Black Sea-a an ram nekna a nat zel a duan niin an sawi.
Lawng lian pil ta hi United States chuan Russia tana ‘chhiatna lian tak’ niin a sawi a, Ukrainian Neptune missile hmanga kah a nih thu erawh an sawi lo.
Russia-in February 24-a Ukraine a rûn tan niah khan Moskva hmang hian Ukrainian ramri vengtu sipai, Black Sea-a Snake Island-a awmte chu inpe tura tih an ni a, anni hi inpe duh lovin an martar phah a ni.
Soviet hun laia siam, Moskva hi kum 1980 chho vel atanga hman tawh kha a ni a. Tunah hian Ukraine chhim lam, Mykolaiv bul tuipuiah a pil ta a, he khawpui hi tun hnaiah Russia-in nasa taka a bomb a ni.