Chief Minister Zoramthanga chuan Govt. Serchhip College-in NAAC ‘A’ Grade Accreditation a hmuh lawmpui nan Administrative Building sak nana an dil Rs. nuai 612 chu pek an nih tur thu a sawi.
Ningani kalta khan Govt. Serchhip College-in NAAC Grade ‘A’ Accredication pek an nih lawmna chu khuallian niin chief minister-in a hmanpui a. College tual zawl hulhliapa lawmna hun hmanah thu sawiin chief minister hian grade tha tak hmu thei chu zirlaite leh zirtirtute hmalakna leh college administration tha taka kenkawh a ni tih a tihlan thu a sawi a. Hei hi a bultanna niin hei aia rahbi sang la kal zel turin duhsakna a hlan.
Chief Minister Zoramthanga hian Govt Serchhip College chu Grade ‘A’ chung lama hlawhtlinna la awmte nei zel tura duhsakna hlanin, college-in an mamawh em em Administrative Building sakna tura Rs. nuai 612 an dil chu Grade ‘A’ an hmuh lawmpui nan pek an nih tur thu a sawi a. Coaching centre kalpuina tura MYC-a tanpuina an dil pawh an hmuh theih nan a umzui dawn tih a sawi.
Covid-19 leng avanga hun rei tak zirna kalpui mumal theih a nih loh hnuin hun tha a inherchhuak tih khuallian Zoramthanga hian sawiin, he hun tha hi hman tangkai thiam a pawimawh hle tih a sawi a. Tumruhna neih a pawimawh tih pawh sawiin, khawvelin mi bik nia a sawi te chu mi naran ve mai, tumruhna nei tlat mite an ni tih sawiin, “Tumruhna nei tlat mite chu an hlawhtling thin tih hre reng chungin, chu chuan hlawhtlinna tlangah a lawnpui dawn che u a ni,” tiin zirlaite a fuih.
Serchhip bialtu MLA Lalduhoma pawhin thu sawiin, Mizoram mai nilo, India ram pumah pawh Govt. Serchhip College chu chhuanawm a tih thu a sawi a. Career Coaching Centre mumal taka kalpui chhunzawm zel anih theih nan MLA Fund chu engtik lai pawha hman theih a nih tur thu leh, hemi kalpuina atana MYC hnena an mamawh sum cheng nuai hnih pek an ni tur chu lawmawm a tih thu a sawi bawk.
He hunah hian khuallian leh Serchhip bialtu MLA bakah Sports & Tourism Development Board Vice Chairman T.C. Pachhunga, Serchhip DC Nazuk Kumar leh Higher & Technical Education Department Joint Director Dr. Lalthansangi Fanai te pawhin an lawmpuina thu an sawi.
Govt. Serchhip College Principal Dr. C. Vanlalnghaka chuan Assessment-ah CGPA 3.18 pek an nih thu a sawi a. National Assessment and Accreditation Council hi UGC hnuaia autonomous body niin, ram puma zirna in sangah zirna quality tha a awm theih nan a din a ni a. College leh University te tehfung hrang hrang hmangin a endik thin a ni.