Traffic jam awm lohna khawpuia siam an tum, Aizawlah traffic jam a nasa a, lirthei an pung zel bawk.
Kum 2018-a MLA inthlanpui neih a nih dawn khan tuna sorkarna fawng chelh mektu Party au hla pakhat chu an sorkar huna ‘Aizawl khawpui traffic jam harsatna awm tawh lohnaa siam’ a ni a, August 20, 2018 khan hemi chungchang hi MNF President Zoramthanga’n Mizo Hnam Runah a sawi a; hmun danga vantlang hmaa thu a sawinaah pawh au hla berah a hmang.
An intiamna zinga mi tihlawhtling turin traffic jam pum pelh nan Parking House Support Shceme (PAHOSS) an kalpui a, he scheme hnuaia tanpuina dawng te’n LMV 68 leh Two wheeler 323 dahna an siam zo tawh.
Hei hian Aizawl khawpui chhung traffic jam erawh a tiziaawm rih lo niin a lang a, April 4, 2022 atang chuan ambulance pawh a tlan hleih theih loh khawpin traffic a jam nasa.
Mizorama district 11 awmah Aizawl district hi lirthei tamna ber a ni a, transport department-in an chhinchhiah danin, March 23, 2022 thleng khan Mizoram sorkara ziah luh lirthei chi hrang hrang 3,18,465 a awm tawh a; chung zinga 2,22,332, za zela 69.81 chu Aizawl district chhunga mi a ni.
Traffic jam zual zelna Aizawl district-ah hian kumin January 1 atanga March 23 inkar chhung ringawt pawh khan sorkara lirthei ziah luh thar 4,135 a awm tling tawh.
Lirthei awm tamna ber leh traffic jam-in mipui nunphung a tihbuai rawkna khawpui-ah hian Traffic Police an indaih lo hle niin Traffic police hotuten The Zozam Times an hrilh a, traffic police pakhatin lirthei 1,000 zel vil ang an ni tih an sawi.
Sorkarin a ngaih pawimawh ber zinga mi, Aizawl traffic jam nasa tireh turin hmalakna hrang hrang neih a ni a, ministry of finance hnuaia department of economic affairs leh Asian development bank ten inremna an siam angin US dollar nuai 45 hu loan chu state sorkar pek a ni dawn a, chu loan chu Aizawl khawpuia kawngpui tawt lutuk vanga lirthei chet velna harsatna sutkianna tura ruahmanna hrang hrang siamna atan hman tur a ni.
Traffic Jam nasa hian mipui khawsak phung a tikhaihlak nasa a, Thakthing atanga Dawrpui thlen nan pawh darkar khat chuangte hun hman a ngaih phah. Zirlai zingah a hun taka an sikul thleng thei lo an awm phah a, sorkar hnathawkte an tlai zual phah a; lirthei hmanga sumdawngten an tuar hle bawk.
Two wheeler taxi driver thenkhat The Zozam Times-in a kawm kual te chuan, lirthei ke hnih tan pawha tlan harsa khawpin traffic a jam nasa a, hemi avang hian tlan tam a har a, nikhata an sum hmuh tur ang an hmu pha lo tih an sawi.
India rama state capital zinga traffic jam awm lohna hmuna siam an tumna kal zelah hian kawng chhawng siam chungchang ri pawh a ring hle a, hemi tihlawhtling tur hian consultancy firm – Telecommunication Consultant India Ltd-in draft feasibility report an theh luh tawh thu chu Chief Minister Zoramthanga’n March 2, 2022 khan Assembly House-ah a sawi chhuak.
Kawng chhawng siam an tumna kawnga hma la tura an rawih consultancy firm-ten report an siam chu central ministry-ah approve tura an thawh thu leh approval nghak mek a nih thu hemi tum hian a sawi tel.
Traffic jam tihreh nana PAHOSS an kalpuina, kawng chhawng siam an tum mekna leh ADB loan hmanga hmalakna an tumna Aizawl-ah hian lirthei chi hrang hrang zinga tam ber chu two wheeler niin, 1,48,514 lai a awm a. Hei hi lirthei awm zawng zawng atanga chhuta a za zela 66.79 a ni a, motor car-in dawtin 43,454 a awm.