Pakistan-a Sri Lankan pa pakhat, sakhaw sawi bawrhbanga puh vanga sawisak hlumnaa mawhphurtu mipa parukte chu thi tura an chung thu relsak an ni.
Kum 48 mi, factory manager Priyantha Diyawadanage-a hi December thla khan Sialkot khawpuiah nasa taka sawisak niin a thi a, a ruang hi hal zui a ni.
He thil thlengah hian mi 88 chu thiam loh chantir an ni a, mi pakua chu dam chhung tang tura tih niin mi dangte pawh kum hnih atanga kum nga tang tura hrem an ni hlawm.
He thil thleng hian an ram pum nghawngin hetih hun laia an prime minister, Imran Khan-a pawhin ‘zahna ni’ tiin a sawi.
Social media-a video thehdarhah chuan mipui pungkhawmin Diyawadanage-a hi a hnathawhna hmun atanga pawt chhuakin an sawisa hlum a ni.
A ruang hi an hal zui nghal a, mi tam tak chuang a ruang langin anmahni leh mahni thla an inlan (selfie) nghe nghe.
Diyawadanage-a nupui, Nilushi Dissanayaka-i chuan internet velah a pasal an tih dante a lo hmu ve a, an chet dan chu a mihring lo hle niin a sawi.
Diyawadanage-a hi Islam sakhaw tibawrhbang zawngin a che nia thu a than hnuah tharum thawhna hi thleng a ni a. Prophet Muhammad-a hming chuanna poster a pawt thler niin an puh a ni.
A thawhpui, amah an sawisak lai pawha chhan tuma beitute chuan thil thlen hnu lawka tual chhung chanchinbuten an kawmnaah chuan Diyawadanage-a hian sakhaw tihbawrhbanna lam hawi ni lovin, in tihfai a tumna lamah poster intarte a la thla mai niin an sawi thung.
Mi za chuang inhnamhnawihna, he tualthihna hian ram pawh a barakhaihin dan sawiseltu pawh an tam phah hle.
Sakhaw tihbawrhbanna leh Pakistan
Sakhaw tihbawrhbanna hi sakhaw pakhat emaw, pathian emaw sawi chhiat leh tihchhiatna tihna a ni a. Pakistan bikah hian Islam sakhaw tibawrhbang chu thi tur thlenga hrem theih a ni.
Pakistan blasphemy law-ah chuan sakhaw inkhawm tihbuai te, mitthi vui laia kaltlang te, mi rinna sawihnawm te, pathian biakna hmun tihhnawk leh thil eng emaw lo dahte a khap.
Inhremna danah hian kum 1986 khan Muslim sakhaw lehkhabu thianghlim, Quran tihbawrhban chu dam chhung tan theih tih an belh bawk.
Kum 1986 vek khan Prophet Muhammad-a tibawrhbang hremna dah belhin thi tur emaw, dam chhung tang tur emawa hrem theih a ni.
Pakistan-ah hian sakhaw tibawrhbanga mi puha mipui inhawr khawmin tharum an thawha mi chil hlum ang chi a tam hle a. Mihring dikna chanvo humhalhtute chuan sakhaw betu tlem zawkte tum bik an ni tih an sawi thin.