Delhi leh a chhehvelah tun hnaiah Covid-19 kai an pun leh deuh avangin vantlang hmuna hmai an tuam lo mante chu pawisa chawitir an ni leh tan dawn a, inkhuahkhirhna an kalpui leh ang.
Delhi Disaster Management Authority (DDMA) thukhawm chuan he thutlukna hi siam thar lehin khawpuia hri kai dinhmun an thlir thar leh a. Vantlang hmuna hmai tuam lo mante chu Rs. 500 chawitir tura tih a ni.
Sikul erawh khar a la ni dawn lo va, mi thiamte nena inrawn chungin hri a darh lohna turin hung chhunga inkaihhruaina thar erawh ruahman a ni ang.
DDMA thutkhawmah hian endik pawh tam lehzuala tih thar leh bakah invenna pek pawh tihchak lehzual ni se an ti bawk.
India khawpui berah hian tun hnai ni rei vak lo kal ta atangin Covid kai hmuh chhuah an pung leh deuh va. Thawhlehnia bulletin chhuahah ni khata kai hmuh chu a hma ni aiin 26%-a pungin mi 632-in an kai a ni.
Sample endik atanga kai hmuh zat bi (positivity rate) erawh Thawhtannia 7.72% chu a tukah chuan 4.42%-ah a tla thla thung.
Doctor-te chuan ni reilo te hnuah Covid kai hi an tam dawn niin an sawi lawk bawk.
Delhi thuneituten inkhuahkhirhna an tihkhauh leh hret hma lawk hian an thenawm, Uttar Pradesh chuan an khawpui, Lucknow leh NCR district parukah hri kai an pun leh avangin vantlang hmuna hmai tuam ngei turin mipuite an lo tithar tawh bawk.
Chawlhkar thum chuang hret liam taah khan DDMA hian vantlang hmuna hmai tuam lote Rs. 500 chawitir thin chu a titawp a. Hmai tuam chu tih ngei ngei tur ang pawha tih tawh lovin, vantlang hmunah erawh tuam hram tur chauhvin mipui a lo ngen tawh a ni.