Chhiah pe lo leh registration nung tawh lo lirtheite black list hnai

Mizoram sorkara lirthei ziah luh, chhiah pe si lo leh registration nung tawh lo thahnem tak a awm a, chungte chu department-in hunbi a tiam chhunga ngaihven a nih loh chuan black list-ah dah an ni dawn.
Lirthei registration nung tawh lo hi nikum December 31 thleng khan 8,709 a awm thu hi Transport Director Lalrammawia chuan nimin khan Aizawl City Bus Owners’ Association-in General Assembly vawi 48-na an hmannaah a sawi.
Heng lirthei neitute hi demand notice an pek mek thu a sawi a, hun tiam chhunga an lirthei registration an tihnun loha an chhiah bate an pek loh chuan black list-ah dah a ni leh dawn tih a sawi.
Hemi chungchang a sawi zaunaah transport director chuan Mizoramah lirthei ziah luh, chhiah pek leh dan zawm tur zawm lo an awm tam avangin kum 2019 khan registration nung tawh lo an zawn chhuah thu a sawi a, “December 31, 2019 thleng khan lirthei registration nung tawh lo 48,499 chu a neitute demand notice pek an ni a, an chhiah bate an pek theih loh avangin black list-ah dah a ni tawh,” a ti.
Demand notice an pekte hi thla thum chhunga registration an tihnun loh chuan suspend thin a ni tiin, chumi hnu thla thum dang leh nghaka an la tihnun loh fo chuan lirthei registration chu tihtawp (cancel) a nih thin thu a sawi.
Lirthei nei duh, chhiah pe tha duh si lo an tam thu a sawi a, “Kristian ram tih atan pawh a mawi lo a, mipui chhiah bat hreh lo an tam a, tan kan lak a ngai khawp mai,” a ti.
Sorkar laipuiin ruahmanna a siam angin lirthei kum 15 tling chin tawh renew man chu a let riatin tihsan a ni dawrh dawn tih Rammawia chuan sawiin, lirthei hlui tawh lutukte chu dah bo dan ngaihtuah a ni dawn tiin, motor fitness endik pawh khawl hmanga tih vek tawh tur a nih thu a sawi.
Transport department-in online payment system an kalpui dan sawi tel bawkin, lirthei chhiah chi hrang hrang chu online-a pek vek theih a ni tawh a, “He system hi kan hman atangin financial year tawp thleng khan vaibelchhe riat chuang hmuh a ni tawh,” a ti.
Bus neitute chu special permit an lakna kawnga harsatna an tawh thinte pawh sutkian mek a ni tiin, special permit-te pawh online hmanga pek theih a nih tawh thu sawiin, learner license pawh online hmanga exam theih turin ruahmanna an kalpui mek thu a sawi bawk.
ACBOA General Assembly chawhma hun hi an president, Zoliansanga’n a kaihruai a, general secretary leh finance secretary report ngaihthlak a ni a, city bus zinga hmeichhe conductor hmasa ber, nula Vanlalsangkimi chawimawina hun hman a ni a, chawhnuah ro an rel.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427