Ram pum huapa inzar pharh an tum meknaah Punjab assembly inthlana chak hlim, Aam Aadmi Party (AAP) chuan hmarchhak lam an hawi veleh mek.
AAP hian kum kua zet hnua inthlan buatsaihna tur, Guwahati Municipal Council (GMC) inthlanah pawh an chuh ve a, hei hi Ningani hian neih tur a ni.
Ward 60 awmah chuhtu mi 200 awmin ward zahve hi hmeichhe tana hauh a ni nghe nghe a. AAP hian candidate 39 an nei.
Hmeichhe tana hauh zingah hian Scheduled Caste leh Scheduled Caste (Hmeichhia) tan ward khat hauh awmin Scheduled Tribe tan ward khat leh Scheduled Tribe (Hmeichhia) tan khat hauh a ni bawk a, a bak 26 chu hmeichhia tute tan pawh chuh theih a ni.
“Huang zauh zel kan tumna kawngah hmarchhakah hian AAP-in zahawm taka politics a khelh dan chu lantir kan tum a. A vawi khat nan Guwahati-a khawpui rorel khawl inthlan chuh kan tum a. Mipuite zingah BJP laka lungawi lohna nasa tak a awm tih kan hria a; mahse, anmahni paih thlaa do let turin Congress-in tha an nei rih si lo,” tiin AAP National Council member leh Assam in-charge, Rajesh Sharma chuan NDTV a hrilh.
“Assam dawtah hian Tripura-a inbun kan tum leh ang,” tiin Sharma hian a sawi bawk.
Guwahati-a a campaign-naah khawpuiin harsatna hrang hrang a tawhte an chin fel tur thu a sawi a. Boruak bawlhhlawh tihziaawm te, fur laia tui lian an tuar thin leh tui harsatna awm thinte pawh chin fel a tiam.
“Arvind Kejriwal-a’n entawn tur a lo siam tawh hmasawnna politics hi Assam-ah kan lo keng lut dawn a. Thla khat lek chhungin mi nuai hnihin min zawm hman a, ni tin mi 500 chuang min rawn bepawptu an awm ziah a ni,” tiin AAP hruaitu, Laxmikant Dubey chuan a sawi.
Thla hmasaa Tinsukia leh Lakhimpur-a tual chhung rorel khawl thlannaah AAP hian ward hnih an lo la tawh a. An state-a mi tam tak chuan inthlan leh tur pawh hi BJP leh AAP inbeihna angin an ngai a ni.
“Thalai tha tak tak chuhtu kan nei a, BJP hian kan candidate-te hmin an tum a; mahse, keimahniah an inpe nghet tlat,” tiin Bhaben Choudhury, Assam State Coordinator chuan a sawi.
Congress-in candidate 55 an nei ve bawk a, a tam zawk hi thalai niin BJP-in candidate 53 an nei bawk.