Eibar dinhmuna an chhiat em avanga Sri Lanka mipuiin sorkar duh lohna an lantirna hmunah police-in a hnawh darh nan silaiuu an hmet puak a, mi pakhat a thiin mi dang 14-in hliam an tuar bawk.
An ram laili, Rambukkana khuaa police-in silai an hmet puak lai video hi social media-ah nasa taka thehdarh a ni.
Police chuan ‘tharum na lo tak an hman’ thu an sawi a; mahse, silai kher an hmang erawh sawisel a hlawh hle.
He thil thleng hi Sri Lanka-a UN aiawhtu leh United States leh EU palaite pawhin an dem thu an sawi.
Tar lan fo tawh angin thliarkar ram hi kum 1948-a Britain atanga an indan hnua eibara an dinhmun chhiat lai ber an tawng mek.
An ramin pawisa a neih loh avanga ram dang atanga ni tin mamawh zual pawh an lak luh theih loh avangin thil man a sang a; tuialhthei, damdawi leh electric thlengin an tlachham a. Mipuiten khawlaiah sorkar duh lohna nasa takin an lantir.
Mipuite hian President Gotabaya Rajapaksa -a thil kalpui dan avangin hetiang dinhmun tawng nia inngaiin a bân an phut a, amah erawh chuan a tum lo.
Rajapaksa hian ‘tihsual’ tam tak a neih thu hi a pha lo va, Thawh\anni khan cabinet thar a din leh a, hei hian Sri Lankan tam takte thin a tirim zual hle.
Thawhlehni khan Sri Lanka-ah hian tuialhthei pe chhuaktu lian berin a man chu 65% dawna an tihsan avangin hmun hrang hrangah duh lohna hi lantir a ni a. Ni tin mamawh dang man pawh hemi ni hian tihsan a ni.
Rambukkana khuaah hian tuialhthei duhin mipuite hi darkar 15 chuang an pungkhawm tawh a. Lirthei leh bus khalhtute thinrimin lirthei ke halin an khawpui, Colombo leh Kandy kalna kawngpui lian an dang bawk.
Hliam tuar zinga pathum chu an na hle a. Thi mipa hi kah ni ngeia a lan thu Kegalle Teaching Hospital-a director, Mihiri Priyangani chuan Reuters news agency a hrilh.
“Silaia kah ni ngeiin kan ngai a; mahse, chiang zawk hre turin endik a ni ang,” a ti.
“Police hian mipui thunun tumin silai an hmet puak a, lirthei ke an hal a, hnawh darh an tum a ni,” tiin police thupuangtu, Nihal Talduwa chuan BBC a hrilh.
Thuneitute chuan mipuite hian lung leh thil dangin police hi an vawm a, hliam pawh an awm nual a, silaia an kah let chhan erawh an sawi lo.
Inspector General of Police CD Wickramaratne chuan thuchhuah siamin police hian mipuiten tuialhthei litre 30,000 zet phur hal an tum hnawh darh nan silai an hmet puak niin a tar lang.
Mipuite erawh chuan hei hi an pawm lo va, social media-a video darhah pawh truck khawih an tum awm angin a lang lo.
An ram chhung hmun dangah pawh police hian mipuite bei leta mittui tlakna hmanga an kah thu pawh sawi rik a ni.