Delhi-a Jahangirpuri vengah chuan Muslim leh Hindu an intihbuai hnu leh dawr leh in thiah a nih hnuah boruak a la tang chhunzawm zel.
He vengah hian Inrinni khan Hindu-ten kawng an zawh laia mosque an kal pelh laiin Muslim nen an intibuai a. Hindu leh Muslim-te hian buaina chawk chhuak hmasaah an inpuh tawn ve ve.
Buaina chhuakah hian police pasarih nen mi pakua velin hliam an tuar.
He thil thlen hnu lawk, Nilaini khan he vengah tho hian dan dik lova in sate chu thiahsak zui an ni a. Tual chhung roreltu, India ram puma sorkarna fawng chelh mek, Hindu nationalist BJP party chuan in thiahsakte hi dan zawm lova sate an nih hlawm thu an sawi.
Muslim-te erawh chuan chuang a nih loh thu leh an in leh lo an tumsak nia sawiin an chet hun an sawisel bawk a, Supreme Court-in thiah hna an kalpui titawp tura a tih hnuah pawh an thiahsak chhunzawm niin an sawi bawk.
Ningania court sang berin thupek a chhuahah chuan khawi ve ve mahin heng lai hmunah hian kutthlak lo turin a ti a ni.
Delhi-a thil thleng hi kar hmasaa BJP rorelna state tho, Madhya Pradesh-a thleng nen an inang hle a. Khargone khawpuia Muslim-te chuan Hindu sakhaw thiltihnaa an intihbuai hnu lawkah an inte thiahsak an ni tih an sawi ve tho.
Jahangirpuri-a chengte chuan excavator an hmuh chuan mak an ti hle tih an sawi a, a hmain dan lovin in an sa a ni tih hriattirna engmah an dawng lo niin an sawi a. An veng kawng chep takah chuan police za chuang, riot gear nena inthuamte chuan excavator truck-te an kal theih nan hma hruaiin kawng an thian niin an sawi a. Heng lai vel hi Bengali tawng hmang Muslim rethei tak tak chenna niin Bengali Hindu in leh temple liam lo takin a hual a ni.
A chengte hian an in leh lo tihchhiat a ni lai chu an thlir a, court-in tawp tura thu a pek hnu darkar khat laiah pawh a thiattute che chu an la thlir a ni.
Tual chhung roreltute chuan dan bawhchhiaa vantlang leh sorkar ramn nektute chu an tichhe zel dawn tih an sawi.
Delhi-a tual chhung rorel khawl hian hetianga an thiah hma hian a luahtute chu ni nga tala hmaah an an hriattir hmasa tur a ni thung.
Supreme Court chuan in thiah dodala petition thehluttute chu hriattirna pek an nih hmain thiahsak an ni ngei em tih finfiahna affidavit thehlut turin a ti.
Court hian a ngaihtuah chhunzawm leh ang a, chawlhkar hnih hnuah a ni ang.
Muslim-Hindu buaina zuitu in thiahsak?
Delhi-a Jehangipuri venga Nilainia thil thleng hi thuneitute chuan tute nawrna avanga ti mah an nih loh thu sawi mah se mi tam tak chuan BJP hruaitu pakhatin a nawr vang bakah ni li liam ta leka Muslim leh Hindu intihbuaina chhuah hnu lawka chetna a nih avangin inzawmna a neih an ring hle a, zawhna leh sawi leh sel a tam phah.
India ram hmun dangah tun hnaiah Muslim leh Hindu sakhaw zuitute inkara buaina a chhuah hnu lawka Delhi-a thuneitute chet zuina ang hi a thlen fo tawh avangin rinhlelh a hlawh phah.
Kar hmasa khan Madhya Pradesh state lailia Khargone khawpuiah pawh April 10 khan Hindu-ten Lord Ram-a piancham an lawmnaah buaina a chhuak a. Hindu-te hi ngunhnam leh tiang kenga kawng zawhin Muslim chenna veng leh mosque an kal pel.
Hetih lai hian sakhaw pahnih zuitute hi intihbuaiin lungin nasa takin an intawng niin police chuan an sawi.
A tuk chiahah bulldozer-in Khargone-a veng pangaah building 50 chuang nawr chhiat zui niin thenkhat chu in leh dawr a ni a. A vaiin ni lo mah se a tam zawk chu Muslim-te in hmun lo ram niin tual chhung chanchinbute chuan an tar lang.
Khargone District Collector P Anugraha erawh chuan, “Building tihchhiat takte hi dan lova sak an ni a, sakhaw pahniha mite, mipui ram nektute in a ni,” a ti ve thung.
Tun thlaah vek hian Madhya Pradesh leh Gujarat-ah pawh Hindu sakhaw kût hmannaa intihbuaina a chhuah hnu lawka in eng emaw zat lo nawr tluk a ni tawh bawk.
Heng state pahnihte hi BJP rorelna ve ve a ni.