Barcelona in La Liga intlansiaknaah pahnihna hauh leh turin hnehna an chang a. Real Sociedad chu 1-0 in an hneh hram.
Ningani zana San Sebastian a Reale Arena a inkhelah hian Barca tan chak a awlsam lova, mualneitu Real Sociedad inkhel a fakawm hle.
Minute 11-naah Pierre-Emerick Aubameyang chuan Barcelona goal a khung a. Gabon striker hian Barca tan La Liga match 11 atangin goal 9 a khung tawh.
Hma an hruai hnuah erawh nasa takin Real Sociedad beihletna an ven a ngai a, a bikin second half-ah Barcelona an bet hle.
La Real tan an tlarhma a khel Alexander Isak leh Alexander Sorloth ten huntha an neih an hmang tangkai thei lova. Barcelona goalkeeper Marc-Andre ter Stegen chuan Sorloth lakah save ropui tak a siam bawk.
Hnehna an chan avangin Barcelona in a zawna match hnih an tlawm tawhna an titawp a, an chung a awm Real Madrid nen erawh point 15 in an la inthlau.
Hetihlai hian pahnihna nih inchuhna leh UEFA Champions League khelpha tura inumna erawh a la nung hle a. Pathumna a awm Sevilla nen point hmuh inang mahse Barca hi khelh khatin an khel tlem zawk.
Real Sociedad hian khelh nga la hmabakah point 55 hmu in beisei an la nei ve bawk a, palina a awm league champion lai Atletico Madrid aiin point rukin an hniam.
Xavi a lawm, mahse Barca an vannei
Zirtawpni zan inkhelah Barca in an tlo na an tilang a, chutihrualin an tlarhnung a khel palite inhliam avangin buaipui an ngai vek.
Ronald Araujo, Dani Alves leh Gerard Pique te an inkhel zo thei lova. Eng ang taka inhliam na nge an nih hriat a la ni lo.
Coach Xavi Hernandez chuan, “November a he team ka enkawl tan hnua inkhel pakhata ka buai nasat ber tum a ni ang. Real khan inkhel an thunun a, team tha tak an ni. Duhtawkin min nawr a, draw result neih an phu. Chumi avang tak chuan he hnehna hi hnehna pawimawh tak a ni a, pahnihna kan nih mai bakah result kan sualchhuak a. Season thar a Champions League khelh kan hnaih sawt.” tiin a sawi.
A player te inhliam chhan chu sawifiahin, “Kan inkhelh dan ka thlak a, minute 90 chhung tak tak tlan a ngai. Hei hian taksa a heh a, defender tan tlan hnem a ngai zual. Thla nga chauh a la ni a, a hma in hetiang a ni ngai lo nen, kan fixture a hautak bawk a, taksa in a tlin lo thin.” a ti bawk.