aIZAWL: India zalen kum 75 tlin lawmna kal mek ‘Azadi Ka Amrit Mahotsav’ pengpakhat atana hman, Prime Mi- nister Narendra Modi ruahmannaa ‘Meet The Champion’ proggramme chu nimin khan St. Maria Gorreti School, Kolasib Venglaiah Kolasib district education office-in a buatsaih a. Mizo hmeichhe Olympian hmasa- ber Lalremsiami’n zirlaite kawm in, zawhna an neih te a chhang.
Lalremsiami chuan infiammi a nih anga a taksa fit reng tura ei leh in-a a fimkhur thu a sawi a. Mizo thalai ten spicy noodles lam an ei nasat thu leh taksa tana chaw tha dang nen a inmil tawka ei loh chuan hriselna atan a that loh theih thu sawiin, insumna tlachhamlo turin zirlaite chu a chah a. A inkhelh hnuah taksa mamawh loh thilte chu chak chung chunga a ei loh thin thu a sawi.
“Ei leh in tha hi infiammite tan chauh ni lo, zirlaite tan pawh thil pawimawh tak a ni” Lalremsiami chuan a ti a. Taksa fit turin hmun hla taka kal emaw gym kal kher emaw a ngai lo tih sawiin, naupang thanglai tan ni khatah darkar chanve chhung tal taksa sawizawi a that thu a sawi a. Sorkar laipuiin ‘Meet the Cha- mpion’ programme a buatsaih chu tha a tih thu leh Prime Minister-in remhre taka hetiang hun a siam chu lawmawm a tih thu a sawi bawk.
Dy DPC, Samagra Shiksha R Lalramhluna’n ‘Meet the Champion’ programme chu Tokyo Olympic, July 23, 2021 atanga August 8, 2021 chhunga neiha India ram aiawha tel Indian Olympian te chu India ram hmun hrang hranga zirlai ten hmuin, hmaichhanah titi pui sela, zawhnate zawtin naupang ten sports, ei leh in tha, nungchang tha, zirna thiamna an neih theihna tura awmzia a neih beiseia Prime Minister-in a ruahman a nih thu a sawi a. India zalen kum 75 tlin lawmna kal mek ‘Azadi Ka Amrit Mahotsav’ pengpakhata hmanga sorkar laipuia ministry of education leh ministry of youth affairs & sports-in India ram hmun hrang hranga a kalpui a nih thu a sawi bawk a ni.