Rajasthan High Court chuan thuremna danglam leh thleng ngai lo tak tichhuakin, lung in tang pa pakhat chu a nupuiin a ngen angin nau an pai ngei theih nan ni 15 chhung a chhuah lailawk a phalsak.
Jodhpur bench chuan he thu hi ngaihtuahin kum 34 mi, Nand Lal-a chu a nupui, Rekha-i’n a pasal hian ‘chi thlah tura dikna chanvo’ a neih angin chhuah lailawk dilin petition a thehlut a. Justice Sandeep Mehta leh Justice Farjand Ali te awmna bench chuan an phalsak a ni.
Judge-te chuan Lal-a nupui hi sual ve lo a ni tih sawiin, “Mipat hmeichhiatna kawnga a duhte chu a pasal lung in tanna hian a tihkhawlhkhamsak,” an ti.
“Hetiang a nih avang hian kil hrang hrang atanga thlirin, mi tang hnena chi thlah theihna chanvo leh an duhna tihhlawhtlinsak chu tih tur a ni,” tiin high court hian thu a rem.
“Mi tang kawppuiin chi thlah theihna dikna chanvo a neih chu a kawppui a tan avangin hreksak ngawt theih a ni lo,” tiin April 5 khan thuremna a tichhuak a ni.
Court hian an thuremnaah hian danpui behchhan bakah sakhaw hrang hrang – Hindu, Judaism, Kristian leh Abrahamic sakhaw hrang hrang rinnaah pawh chi thlah chu a pawimawh hle tih a lang tih a tar lang bawk.
Court hian chi thlah theihna dikna chanvo chu ra, Danpui Article 21-a lang, fundamental right-a right of life-in a phalsak niin a tar lang bawk.
Lal-a hi kum 2019 khan Bhilwara court chuan dam chhung tang tura hremin Ajmer Central Jail-ah a tang mek a. Kum 2021 khan ni 20 chhuah lailawk a lo ni tawh bawk a ni.