Sorkara chhiah, non-tax leh tax-te kim taka a luh theih nana hma latu, Mizoram Resource Mobilization Committee leh Chief Minister Zoramthanga chu nimin khan an inkawm a, hmalak leh zelna tur an sawiho.
He an inkawmnaah hian MRMC Vice Chairman Liansuama chuan an hmalaknate sawiin tun thlengin vawi ruk an thukhawm tawh a, hemi bakah hian consultation meeting vawi hnih an nei tawh a, consultation-ah hian department paruk an kawm tawh tih a sawi.
A sawi zel danin, March thla tawp lam khan an hmalakna hmasak ber report an thehlut a, an report-ah hian Mizoram sorkar hnuaia chhiah, a bikin VAT pek lohte chak zawka thin chhuah dan tur te, department hrang hrangte bank account-a pawisa an kawl thin pung sorkar sum bawma chhun a nih theih dan tur te leh sorkar sumdawn hrim hrim a pelhe loh nana receipt computerization chungchang te an First Report-ah hian an tel.
Tuna Second Report an buatsaih mekah NLUP hnuaia Interest Free loan latuten tun thlenga an rulh loh Rs. nuai 674 chuang la awm thin chhuah dan tur te, huan pass-te in hmuna leh (convert) dawna ngai thin, hun eng emaw ti chhung atana ngaihhnathiamna pek chungchang te, GST lakna tur item tun thlenga lak mumal la ni si lo, a bikin leilung hausakna lam atanga GST lak chungchangte bakah hotel/ homestay atanga GST lak chungchang a tel dawn a ni.
Mizoram Resource Mobilization Committee hi kumin January 21, 2022 ah Mizoram sorkarin a din a, Chairman chu H Rammawi a ni.