Aizawl: Kumin January 1 atanga April 21 chhungin Lunglei district chhungah thubuai 44 ziah luh a ni a, chung zinga 13 chu thih danphung pangngai ni loa thihna thubuai a ni a, ruihhlo vaibelchhe khat chuang man hu man a ni tawh bawk.
DIG, Southern Range Dinesh Kumar hovin nimin khan Lunglei SP office-ah Lunglei district Crime Review Meeting neih a ni a, he huna an tar lan danin, January 1 atanga April 21 thleng khan Lunglei district chhungah thubuai 44 ziah luh a ni tawh a, heng zinga 26-te chu court-ah charge sheet thehluh tawh niin, thubuai pahnih final report hmanga thawn kir a ni.
Hei bakah hian thih danphung pangngai ni loa thihna thubuai 13 ziah luh tawh a ni a. Heng bakah hian Lunglei Police hian kum 2022 January 1 atanga March thla thleng khan ruihhlo Rs 1,28,90,000 hu man tawhin traffic rules bawhchhiate hnen atanga pawisa an chawitir chu Rs 1,27,800 a tling tawh a ni.
Nikum 2021 chhung khan Lunglei Dist chhungah hian thubuai chi hrang hrang 137 ziah luh a ni a, conviction rate hi zaa 96.7 a ni.
Nikum chhung khan thubuai an ziah luh atanga thil bo hmuh let zat hlut zawng chu Rs 23,15,764 a ni.
Crime Review Meeting hawngtu Dinesh Kumar chuan police-te chu an smart tur a ni a, rinawmna vawng reng tur an nih thu sawiin, “Kan hnaah rilru pe takin kan thawk tur a ni a, inzah tawnna ngai pawimawhin hotuten tih tur min pek reng rengah rang taka chanchin hrilh leh vat hi police-te tihdan tur a ni,” a ti.
He thutkhawm hi Lunglei SP Rex.Zarzoliana Vanchhawng-in a kaihruai a, Lunglei khawpui chhunga SDPO bakah case incharge officer-te bakah khawpui pawn lam out post-a officer incharge-te an tel a ni.