Bodo hel pawl, tun hnai lawka indin, National Liberation Front of Bodoland (NLFB) chief M Batha, Bindo Mushahary tia an koh bawk, an hruaitu lawk B Bidai leh B Birkhang bakah an pawla mi 20-te chu Ningani khan an ralthuamte nen Lalpani police station, Assam-a Udalguri district-ah an inpe.
NLFB chief Batha leh a \huihhruaite hian an ralthuamte hi Assam Water Resources minister Pijush Hazarika, BTC CEM Pramod Boro, Assam CM political adviser Jayanta Malla Baruah, Special DGP (L&W) GP Singh hmaah an tung a. Minister hian lawm takin an inpekna chu a lo pawm.
“Vawiin hian an lo haw a. M.Batha, Bindo Mushahary tia an koh bawk leh an hruaitu dangte nun dan pangngaia nung turin an lo kir a, an thian dangte pawhin an lo zawm thuai ang,” tiin BTC CEM Boro chuan a sawi.
Batha hi hmarchhaka hel hriat hlawh tak niin January, 2020-a Bodo peace accord ziaha National Democratic Front of Bodoland (NDFB) thiah a nih tak hnuah NLFB hi a din.
Peace accord ziah rual khan a inpe ve a; mahse, ramhnuaiah kir lehin March-ah khan a pawl hi a din a. National Investigation Agency (NIA) chuan a lumanah Rs Nuai 10 a chhiar.