A rilrunatna leh lungawi lohna hriatthiampui lo mah ila, 1987-1996 inkara a lo tal hrep tawhna band hawisan a, a larpui hla te thlenga ngaithla duh thak tawh lotu chu Skid Row band zaipu hlui Sebastian Bach a ni.
A ngaihthlak duh thak tawh loh band an zawhnaah, ‘Skid Row’ tiin a chhâng.
Producer lar tak Jay Ruston-a’n, “Record hralh kal tak tak tichhuak a, a hnu lama enzui loh leh ngaihthlak zui tawh loh band sawi rawh le,” tia zawhna chu Sebastian hian rang mangkhengin, ‘Skid Row’ tiin a chhâng. Hei hian fan tam tak a barakhaih.
Kum 1986 khan Tom River, New Jersey-ah Ame-rican heavy metal band ni turin Skid Row a lo piang a, a tirah tak chuan zaipu hi Theart a ni. An album pahnih Skid Row (1989) leh Slave to the Grind (1991) te chu a lar vet vet hle. Multi-platinum an kai chho nghal vat.
Pathumna, Subhuman Race (1995) erawh a tir lama an hlawhtlinna ang kha a pawchuak zo thei lova, khaikhin lem lovah chuan hralh a kal hle tho.
Kum 1996 a zaipu Sebastian-a’n band a chhuahsan thleng khan Skid Row hian khawvel pumah album copy maktaduai 20 an hralh.