BJP leh an thawhpui, Asom Gana Parishad (AGP) chuan Pathiannia Guwahati Municipal Corporation inthlana vote tlate chhiarah bial (ward) 60 awmah 58 zet lain hnehna an chang chiang hle.
Hmarchhaka khawpui lian bera roreltu thlannaah hian BJP chuan bial 52-ah hnehna changin AGP-in bial ruk an la ve. An state-a rorelna fawng chelh mek party hian thla hmasaaa municipal board inthlanah hnehna an lo chang tawh bawk.
Eptu, assembly-a BJP dawta member ngah ber, Congress chuan bial khat pawh an lak loh laiin Aam Aadmi Party (AAP) chuan a vawi khat nan bial khat an la ve a. Assam Jatiya Party (AJP)-in bial khat an la ve bawk.
“GMC inthlana BJP leh a thawhpuite chiang taka hnehna min chantirtu Guwahati mipuite hmaa kunin chibai ka buk a. He hnehna hian Prime Minister Narendra Modi kaihhruaina hnuaia hmasawnna kawng kan zawh mek hi mipuiten min la ringtawk hle tih a nemnghet nawn leh a ni,” tiin Chief Minister Himanta Biswa Sarma chuan lawm thu sawina a tar lang.
Assam BJP chief Bhabesh Kalita pawhin hnehna an chan dan chuan Sarma kaihhruaina hnuaia an state sorkar hnathawh that a tar lang tih a sawi a. An party chuan kawng tinrengah khawpui chu hmasawntir an tum dawn tih a sawi.
“Tun inthlanah kan che chhia tih ka pawm a. Guwahati-a chengten BJP hnenah thil tha tihna hun an pe leh a. Guwahati-a buaina lian ber pahnih chu tui lian siamchawp leh tui vang a ni a, heng thil pahnih hi BJP-in a chin fel ngei ka beisei,” tiin Assam Congress chief Bhupen Kumar Borah chuan a sawi ve thung.
Municipal corporation hi kum kua danah dawrh neih a ni a, BJP hian candidate 53 neiin AGP-in pasarihah an chuh thung a. Congress-in bial 55 chuhin AAP-in bial 39-ah an chuh ve bawk.
“Bial khatah hnehna changin kan account kan hawng a. Kan tan chuan thil liantham tak niin Guwahati-a chengte pawhin kan thawhrimna an hria a. A hmain Tinsukia leh Lakhimpur municipal inthlanah bial khat ve ve kan lo la tawh bawk a. AAP tan chuan Assam-a kal dan lawmawm tak a ni,” tiin AAP state president Bhaben Choudhury chuan a sawi.
GMC inthlan hnuhnung ber kha kum 2013-a neih niin ward 31 awmah Congress-in 19 an la a. BJP-in 11 leh AGP-in biak khat an la.
Tun tumah hian ward 60 zetah tihpun niin a zahve chu hmeichhiate tan hauh a ni a. Chuhtu mi 200 awmin BJP candidate pathum (Ward 5, 6 leh 22)-ah chuhtu awm lovin an tling.
BJP hian March thla khan municipal board inthlanah ward 977 awmah 759 zet an lo la tawh a. Municipal board 80 awmah 75 zeah thuneihna an chang tihna a ni.