Samagra Shiksha, Siaha district-in nimin khan Gov’t Higher Secondary School, Siaha-ah inkhawm tawi buatsaihin, a thlawnin zirlaibu an semchhuak tan a. Siaha Bawrhsap, District education committee chairman ni bawk Lalsangliana’n Siaha district khaw hrang hranga a thlawna zirlaibu sem tur te a vailiam.
Siaha Bawrhsap chuan “Zirna-in khua leh tui thaah min siam a, khua leh tui tha awmna ram apiang ram hmasawn leh changkang an ni thin” tiin, zirna tha nei thei tura hmanraw pawimawh ber pakhat chu zirlaibu a nih thu a sawi a. “Sorkarin zirna in tha tak min sak sak bakah, kum engemawzah kalta atang khan a thlawnin zirlaibu a semchhuak tawh, hei hian mipui rorelna democracy ram thatzia pawh a lantir hlein ka hria” a ti bawk.
Sorkar thuchhuahin a tarlan danin, Samagra Shiksha, Siaha district hian primary school naupang 6398 leh middle school naupang 4862 hnenah a thlawnin zirlaibu a semchhuak mek a. Primary school zirlai Class-I atanga IV te hnenah Bu 3 theuh leh Class-V zirlaite hnenah Bu 4 theuha sem a ni. Middle school naupang hnenah Bu 4 theuh bakah Myanmar raltlan naupang 929 te hnenah sem a ni. Siaha district-ah hian Gov’t Primary school 124 leh zirlai 6398 awm mekin, Gov’t Middle school 86 leh zirlai 4862 an awm mek.