Khawzawl district veterinary officer (DVO) Dr. C. Lalsawithuama’n Khawzawl district-ah nikum November ni 18 hnu lamah Vawk pul hri – African Swine Fever (ASF) hmuh a nih tawh loh hnuah tun thla ni 12 atang khan Vawk thi a awm leh nual tih a sawi.
DVO chuan tun thla ni 12 khan Khawzawl Vengthar, Zuchhip leh Darngawn vengahte Vawk an thih thu sawiin, sample 5 test tura thawn mek a nih thu leh result ngaihchan mek a nih thu a sawi a. April ni 12, 2022 atanga April ni 26,2022 thlenga Khawzawl district-a Vawk thi zat 78 a tlin tawh thu a sawi bawk.
Khawzawl Bawrhsap CC Lalchhuangkima hova district level committee on ASF thukhawmin, ASF a darh zelloh nan Khawzawl district-ah khawi hmun atangmaha Vawk leh Vawksa lakluh phal loh ni se, an ti.
Bawrhsap hova thukhawm chuan Khawzawl district chhungah pawh khua leh khaw inkarah Vawk leh Vawksa lakluhtawn leh hralh chhuah khap an rel a. VC te leh Vawk vulhtu pawlte thawhhopuia sawm rawtin, mipui hriatthiam theih tura ASF hrileng do kawnga hriattur tul hrang hrangte puanzar kawngah chak zawka hmalak an rel bawk.