Lawngtlai horticulture division leh Lawngtlai florist Associationa te ṭangkawp buatsaih, ni hnih awh tur Horticulture exhibition chu nimin khan LADC conference hall, Lawngtlaiah Lawngtlai Bawrhsap Dr Andrew H. Vanlaldika’n a hawng.
Horticulture exhibition-ah hian mi 40-in pangpar chi hrang 17 an phochhuak a. Kuthnathawktu 20 ten thei leh thlai chi hrang hrang chi 9 an phochhuak bawk. Tuntum hi Lawngtlai horticulture division leh Lawngtlai florist association-in exhibition an buatsaih vawilina a ni a. Kum 2017, 2018 leh 2020-ah te exhibition an lo buatsaih tawh a ni.
Exhibition hawngtu Lawngtlai Bawrhsap chuan exhibition chu a tui mite incho phur tawnna tur leh thawhrim inzirtirna ṭha tak a nih a beisei thu a sawi a. Pangpar chin leh huan siam chu eizawnna ṭha tak a nih thu leh Lawngtlai district-ah hmasawnna tur leh hmabak tam tak a la awm thu sawiin, awmze neia hma la a, hmun dang aṭanga thei, thlai leh pangpar lakluh ngai lova Lawngtlai district intodelhna tura ṭan la turin pangpar chingtu leh huan siamtu kalkhawmte chu a chah bawk.