America company lar Jeep chuan India ramah SUV tha tak tak an tihchhuah hnuah tunah hian lirthei thar Meridian tichhuak turin ruahmanna an siam leh ta a, company atanga an puanzar dan chuan thla thar ni 1 atang hian a book tan theih dawn a, a man tur puanzarna leh tlangzarhna chu May thla tawp lamah a nih an beisei a ni.
Jeep Meridian hi diesel khawl hmang chauh a awm dawn a. Kawng tam takah Jeep Compass chhuak mek nen a inang ang a, hetihrual hian thutna tlar khat a awm belh theih nan a body erawh Compass nena khaikhin chuan a danglam viau a ni.
A chhung leh pawn
SUV tam tak tihlena tih sei deuha 7-seater model thara an tihchhuah ang aiin Jeep Meridian lo chhuak tur leh Jeep Compass danglamna hi a tam viau mai a. Tih sei ringawt a ni satliah lo a, Meridian hi Compass aiin 364mm in a sei zawk nachungin a hlai lam leh san lamah pawh a danglam viau a. Compass aiin 41mm in a arh zawk a, 48mm in a sang zawk bawk a ni. A hnung ve leh a hma ke innghahna inhlatzawng (wheelbase) hi Compass aiin 146mm in a tui zawk a ni.
Jeep Meridian thar hian body panel thar hlak a nei a. A design lamah pawh hian thil thar, Jeep SUV lar
em em Grand Cherokee L design va pawl tak a ni a. A chhunglamah thung chuan a dashboard bawr chu Compass nen a inang viau a, hetihrual hian a rawng lamah chuan rawng uk a hmang thar a, Compass ah chuan a dum vek tunah hian a hmang mek a, a seat leh hmun dang danga leather kan hmuh pawh a dak nalh viau a ni.
Variant hrang hrangin an ken tel tur chipchiar chu company lamin an rawn puangzar thuai tawhin a rinawm a.A kentel tam zawk hi chu Jepp Compass-a mi ang a ni nual dawn a, Jeep Meridian tharin a rawn ken tel tur zingah hian 10.25-inch digital instrument cluster, 10.1-inch touchscreen with wireless Apple CarPlay & Android Auto, wireless charging, powered front seats, dual-zone climate control, six airbags, traction control, ESC, hill-start & descent control, 360-degree parking camera leh duhthlan theih drive mode hrang hrangte a ni dawn a ni.
Heng bakah hian Meridian lo chhuak turah hian powered tail gate function kan hmuh tel beisei a ni a. Tlangzarh a nih hunah hian Jeep Meridian hi mi 7 chuan theihnain a lo chhuak dawn a ni.
A khawl lam
Jeep Meridian hian 170hp power leh 350Nm torque pechhuak thei 2.0 litre four cylinder multijet turbo diesel khawl a hmang dawn a. Hei hi Compass pawhin a hmang ve tho a, chutihrualin company lam chuan lirthei lian hret tur Meridian te hman dan tur milin he khawl hi an khawih danglam beisei a ni bawk.
Transmission lamah chuan Jeep Meridian hian 6-speed manual leh 9-speed automatic transmission a nei dawn a. Manual transmission hmang ho hi a ke hma tihkal (Front Wheel Drive) a ni ang a, automatic hoah hian a ke zawng zawng tihkal, All Wheel Drive (AWD) a awm tel thung dawn a, report thenkhatin an tarlan danin heng aia khawl te hret 1.3 litre turbo petrol pawh tlangzarh hnuah a chhuah zui vat beisei a ni.
A man leh elpui tur
Jeep hian an lirthei thar tur Meridian hi India ramah zaa 82 chu siam a ni ang, an ti a. Hemi leh thildang zawng zawng nena chhut kual chuan Rs. Nuai 35-38 (ex-showroom) man inkar vel a nih beisei a ni a. Mizoramah pawh lirthei Rs. Nuai 40/50 man leh a aia to mah pawh a tam tawh hle a, Mizoram chhung ngeiah pawh Jeep Meridian hi kan hmu leh nual turah beisei ila, Jeep Compass leh Wrangler Rubicon te hial pawh kan hmuh tawh hi! Khawvel hmundanga thawnchhuah tur, a vei lama a khalhtu thutna awm Meridian pawh India ramah hian siamchhuah tho tur a ni.
Monocoque body hmang ve tho Skoda Kodiaq hi ‘direct’ taka a elpui theih tur ber a tih theih a. Hetihrual hian Jeep Meridian hian a man rualpuia SUV tha tak tak, Toyota Fortuner leh MG Gloster te pawh telin a el vek dawn bawk a ni. Reiloteah Jeep Meridian chungchanga kan hriat tur te kimchang leh dik zawkin kan hre thei turah beisei ila, SUV tha tak India ramin a nei leh dawn.