SEDP hnuaia Human resource development (HRD) board vice chairman L Thangmawia’n MNF sorkar tirh atangin SEDP chu a taka kalpui nghal a nih thu sawiin, “SEDP sum atangin Mizoram mamawh tam tak cheng tam tak sengin thawh a ni tawh” a ti.
Sihphir Neihbawi-a Health clinic centre thar nimina a hawnnaah he thu hi HRD board vice chairman chuan a sawi a. SEDP chu kuthnathawktute hnen thleng phaka kalpui a nih tak thu leh an eizawnna a lo hlawhtlin theih nan MLA bial tinah chhungkaw 1500 tuamhlawm an nih tur thu a sawi.
L Thangmawia chuan SEDP chu a thawhkhatna/first instalment atan Rs 50,000 aia tlem lova pek phawt a nih tur thu sawiin, “A trade azirin a tul anga second instalment pek zel tur a ni” a ti.
MNF sorkarin hriselna lama nasa taka hma a lak thu pawh sawiin, L Thangmawia chuan Health Clinic centre 327 hawn thar a nih thu leh Health sub-centre 247 chu Health and Wellness centre-a hlankai a nih thu a sawi a. Henga thawk tur hian Health & wellness officer 240 lakfel an nih tawh thu a sawi bawk.