Forest survey of India-in a chhut danin November 2020 – June 2021 inkarah Mizoram hmun 12,846-ah ramkang a awm a. November 2019 – June 2020 inkarah hmun 7361 ah ram kangin, November 2018 – June 2019 inkarah Mizoram hmun 7597-ah ramkang a awm a; kum 2004 – 2017 chhung khan Mizoramah ramkang hmun 32659 ah a awm bawk.
Nimin khan Lawngtlai district level committee on fire prevention (DLCFP) chuan Lawngtlai district chhunga ram kang ven kawnga hmalak dan tur chungchanga sorkar department hrang hrang, village council leh tlawmngai pawlte inrawnkhawmna a buatsaih a. Kangmei laka Lawngtlai district a him theihna tura hmalakna tura rawtna hrang hrangte an sawiho.
Inrawnkhawmna kaihhruairtu Lawngtlai bawrhsap Dr Andrew H. Vanlaldika’n kangmei chhuakin a nghawng tam zawk chu a taka tawrh nghal ṭhin thil a nih avangin kangmei ven kawnga hmalaknaah inthlahdah a remlo tih a sawi a. Nikuma Mizoram hmun hrang hranga ramkangin a buaithlak zia leh ramin a tawrh nasat zia a lan chiantir hle niin a sawi.
Kangṭhelhna hmanrua duhthusama neihṭhatloh avang leh ram leilungin a zir loh avangin Forest department, VC leh tlawmngai pawlte an hah hle tih Lawngtlai Bawrhsap chuan a sawi a. “Hei vang hian kangmei ven kawngah awmze nei zawka hmalak dan ngaihtuah a ṭul a ni”, a ti bawk.