Aizawl khawpui chhung hmun 10-a bun, traffic light hmanga kawng kânna, pelican crossing chu July 17, 2020-a hawn ni tawh mah se a nih tur angin hman a la ni lo a, Rs. 22,17,810 sen ralna hi tangkai takin mipuiin an la chhawr lo.
Aizawl Smart City Ltd. hmalaknaa bun hi mipuiten him zawka kawng an kân theih nan siam a ni a, hetih lai hian a enkawltu tur traffic police-te an indaih tawk loh vangin a nih tur angin hman a la ni ta lo a ni.
Rs. 22,17,810 sen ralna hi deputy chief minister-in a hawn hma khan pelican crossing chungchanga sorkar chuan thuchhuah a siam a, “Pelican crossing awmna hmun bikahte hian a bula traffic duty-te kaihhruainaa kawng kân thin turin Mizoram police chuan mipuite kan ngen,” an ti.
Mipuite chu traffic duty-te kaihhruainaa kawng kân thin turin ngen mah se pelican crossing vil nileng tur erawh traffic police an awm lo thung.
Traffic SP Rodingliana Chawngthu chuan traffic police an indaih tawk loh avangin pelican crossing hmang kawng kân tura mipui khalh khawm reng chu thil tih theih a nih loh thu The Zozam Times a hrilh.
Pelican crossing chu manuala control ngai a ni a, tangkai taka hmang turin vil chawt a ngaih thu leh a harsat thu sawiin, “Nileng control tur police duty kan indah thei lo,” a ti.
Traffic police-te hian tih dan than an neih chu hamrik hmang nena mipui kawng kân hun siam a, lirthei che vel thunun a ni a. He an kal dan thin hi pelican crossing vil reng ai chuan a tangkai zawk niin Traffic SP chuan a sawi.
Mipui lam pawhin pelican crossing hman tangkai dan an hriat loh thu sawiin, “Pelican crossing chungchang hi UD&PA-in mipuiah a hman dan tur zirtirna pe chhuak mah se awmzia a awm lo a, mahni remchanna lai laiah kawng an kân tawp tawp zel,” a ti.
Traffic SP chuan Aizawl khawpui lirthei tawt lutuk vil tura traffic police indaih tawk lohzia sawi tel bawkin, thawktu zawng zawng mi 363 chauh an awm thu leh traffic control turin an indaih tawk loh thu a sawi.
Thudawn danin Smart City hmalakna thoin Aizawl khawpui chhungah hian pelican crossing danglam zawk deuh bun tuma hmalak leh mek a ni a, hei hi chuan hmun khat atanga khawl hmanga control tawh tur a ni.