Serchhip bawrhsap Nazuk Kumar-i’n vawikhat chauh hman chi plastic chi hrang hrang hman tlem a tul thu sawiin, Bazara kal pawhin thil lei te ah haw na tur in atanga bag te ken a that thu a sawi a. Hei hian vawikhat chauh hman chi plastic hmanna a ti tlem thei dawn tih a sawi.
India zalen kum 75-na lawmna -Azadi Ka Amrit Mahotsav in Jan Bhagidari Mode, nimina Serchhipa neih a hmanpuinaah he thu hi Serchhip bawrhsap chuan a sawi a. Plastic lam chi hmang tlem tura inzirtir tam a pawimawh thu a sawi bawk.
Thusawitu dang DCSO, Serchhip Lalthanmawia’n hripui leng avanga harsatna hrang hrang avangin sorkar laipuiin miharsa zawkte tan thlatin buhfai kg 5 a thlawna a sem thu a sawi a. May 2020 atanga sem tan a nih thu leh May 2021-ah ruahmanna thar siam leh a nih bakah kumin September thlenga sem chhunzawm a nih tur thu a sawi.
Serchhip district-ah AAY Card nei chhungkaw 1960 awmin, member 5166 leh PHH Card nei chhungkaw 10337 an awm thu DCSO chuan a sawi bawk.
SDO Sadar Lalzikpuii’n Azadi Ka Amrit Mahotsav chu tute department ta bik mah ni lovin, sorkar department hrang hrang te ta a nih thu a sawi a. Jan Bhagidari Mode chu mipui tam zawkin a lawmna an chhim theihna tura buatsaih a nih thu a sawi.
Zing lamah Marathon buatsaih a nih thu sawiin, High school zirlaite tan pawh quiz buatsaih a ni dawn tih SDO (S) chuan a sawi bawk.
Serchhip district agriculture office-in loneitute tana thlai tiak leh tlai chi, chi hrang hrang an ruahman chu Serchhip Bawrhsap Nazuk Kumar-i’n zau hranga hrang aiawhte hnenah a sem nghal bawk a ni.