Hotunu ber pasal halrala hlan tum, inhal tumna a awm lo niin an insawi thung

Champhai Zotlanga a awm, ‘Deleted Kohhran’ tia hriatte chuan an zinga mi, kum 60 bawr vel mi chu halral thil hlanah hlan an tum niin thuthang a awm a, hetih lai hian he kohhran mite erawh chuan inhal an tum lo tih an sawi ve thung.
Champhai Zotlang VCP H.Lalbiakchhunga’n Champhaia thuthar thehdarhtu thenkhat a hrilh danin, Deleted kohhran-a an hotu nu, Thangzeli pasal, Ramtharnghaka chu hal ral thil hlanah hal an tum niin thuthang a awm a, nizan khan he pawla tel mi 60 bawr vel chu an hotu nute in leh a chhehvelah hian an pungkhawm a; Champhai police-ten an kal chilh hnuah ramhnuai lamah an kal darh ta a ni.
H.Lalbiakchhunga chuan Zotlangah hian Deleted Kohhran mi leh sa hi mi 40 vel an awm a, tun hnai khan khaw hrang hranga he pawl zawmtute chu an hotu nu, Thangzeli te inah hian thleng khawmin, inkhawmnate an nei ho thin tih a sawi a, Ramtharnghaka hal ral thil hlana hal ral an tum tih thawm an hriat hian khawtlang hruaituten hmalak dan tur an ngaihtuah ho nghal tih a sawi.
A sawi zel danin, Zotlang veng chhunga tlawmngai pawlte chu Nilaini zan khan an thukhawm a, Deleted Kohhran mi khaw dang atanga Zotlanga zinte chu hawtir rih phawt an rel a. An awmkhawmna hmun chu an pan a, Champhai police-te nen pungkhawmte chu tin darh tura an ngen hnuin hemi zan hian ramhnuai lamah an awm khawm a, nimin zing khan khaw chhungah hian an lut leh.
He pawla telte hi biak pawh theih an ni lo a, khawtlang hruaituten an kawmnaah erawh rannungte pawh kutthlak lo tura an intiam avangin silai leh hmanraw dangte an hal ral tawh thu leh hetihlaia an thuthlungpui hal tum anga sawi awm chu dawt thuthang a nih thu khawtlang hruaitute hi an lo hrilh a ni.
Deleted kohhran hi Champhai Zotlangah hian kum 10 tha zet an lo awm tawh a, kum 10 vel kaltaah electric connection te, gas connection te, bank account leh sorkar thila inthlun zawmnate chu an lo titawp vek tawh a ni.
He pawla telte hian meihawlte an hmang a, solar an chhi a, buhfai leh chini hi a black-in an lei thin a ni.
Member hi 40 bawr vel an awm a, chhungkaw paruk an ni.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427