Liverpool in UEFA Champions League final khelh a hnai a. An mikhual Villarreal hneh taka thunun in Nilaini zanah 2-0 in an chak.
Anfield a inkhelah hian Jurgen Klopp-a pawlten Europe huap inelna a team rem thiam tak Unai Emery-a pawlte chu thiat turin dawhtheihna an lantir a. Villarreal in an tlarhnung nghet taka remin football tha khel mahse a tawp thleng erawh Liverpool an veng zo lova. Team pahnih inthlauhna a lang chhuak.
Reds hian first half atangin team hlauhawm zawk chan an chang a, goal hlauhawm pawh an insiam hnem. Goal khung tur erawhin minute 53 nghah an mamawh a, an goal hmasa zawk luh danah an vannei.
Jordan Henderson-a ball cross chu Villarreal keeper Geronimo Rulli dan hman lohin Yellow Submarines player Pervis Estupinan chaun a lo dang per.
Minute hnih hnu lekah Sadio Mane chuan an goal hnihna a khung nghal a. Mohamed Salah ball pass fing chu goal-ah a chantir.
Second leg hi karleh Thawhlehni zanah Estadio de la Cerámica ah khelh a ni dawn a. He inkhelah pawh hian Liverpool hi chak zawk tura rinkai an ni mek a, Manchester City leh Real Madrid inkhel a chak zawk nen final an khel turah khawvel football in a ngai.
Liverpool an kal zel
Tun season a trophy pali chawi tura beiseina la nei Liverpool in season hun pawimawh an kal chhoh laiin an football tha ber an khel a. Tun dinhmunah an kawng han dal thei tur an awm hmel loh.
Juventus leh Bayern Munich paihthla tawh Villarreal in uluk takin defensive game khel leh mahse Liverpool chu team dang ang an ni lova. Reds goal nawr a hlauhawm a, an khingpuite tan goal hma a inrem a tawm tlat chung pawha inven hneh a har thin.
Henderson-a’n goal a khung hma in Fabinho goal pawm loh a awm tawh a. January a lakluh thar Luis Diaz a hlauhawm em avangin tun season a goal khung thei tak Diogo Jota chu substitute bench-ah a thut a ngai leh.
Liverpool boss Jurgen Klopp chuan, “Second leg-ah Gerard Moreno leh player dangte an khel thei tawh mai thei. Buaina tur erawh a ni lo, kan inkhel tho tho dawn a, halftime chauh a la ni a, mahse tun dinhmunah inkhelh hma aiin kan dinhmun a tha zawk rih.” tiin hmabak an la neih thu a sawi.