Delhi Health Minister Satyendar Jain chuan an state-ah tun hnaiah COVID-19 kai hmuh chhuah pung leh deuh mah se natpui tak an tam lo va, damdawi ina awm ngai zat a la hniam hle tih a sawi.
Jain chuan hri kai zinga damdawi ina luh ngai an tlem chu invenna lak that vang a nih thu leh invenna la kher lo pawhin an taksaah he hri ngaia neiha lo ven theihna an neih chak tak vang niin a sawi.
“Delhi-ah Covid kai an pung leh mek chungin a kai zingah na tak an tam lo va, damdawi ina luh ngai khawp phei chu an tam lo. Hei hi kan mipuiten invenna a bikuma an lak avang leh mipui tam berin a hmaa an lo kai tawh hlawm vang a ni,” tiin Jain hian thuthar lakhawmtute a hrilh.
Naupang zingah hri kai an pun deuh avanga chiai a tul loh thu pawh a sawi a. Sero-survey hrang hrangah hri hi naupang leh puitlingah kai theih dan a inang reng tih hmuh a nih thu leh naupangah chuan natpui tak awm theihna chance a hniam hle niin a sawi bawk.
Ram khawpui berah hian tun hnaiah coronavirus kai hi an pung chak leh tan hle a. Hri kai enkawl lai pawh April 11-a mi 601 chauh awm chu tunah chuan mi 5,250 an tling leh tawh a. Darkar 24 chhungin mi 1,490-in an kai leh.