May thla tir thleng India hmun tam tak lum dawn

India chuan thla thar tir lam thleng khaw lum uchuak tak a tawng dawn a, mi maktaduai tel chu khaw lum lutuk avanga khawsak buai phahna leh rei tak tak power neih loh hmabakin an awm mek.
Meteorological department-a an hotu, Mrutyunjay Mohapatra chuan India hian khaw lum record thar a tawng nual thei niin a sawi a. An agency chu state sorkar leh disaster management nen indawrin a hma thei anga inralrinna tihchhuah zel an tum tih New Delhi-a an kawmnaah a sawi.
Hmar lam leh ram chhung hmun lailiah chuan khaw lum lam hi 46°C zette a ni tawh a. Thla hnih zetin furpui, khua tidai thei ruah thlen hun a la dal bawk si a, thla hmasa kha kum 1901 hnua a lum ber thla a ni tawh.
Khaw lumah hian air conditioner hman nasat a ni a, hei hi power supply khaihlak phahna khawp a ni a; wheat sengin a tuar thei bawk.
Mohapatra chuan tual chhung thuneituten khaw lum lutuk avanga miin harsatna an tawh lohna turin ruahmanna a siam hlawm tih a sawi.
Sorkar chuan mipuite himna tur kaihhruaina a duan ngei hi a pawimawh niin a sawi a. An duh chuan sikul pawh zing lam dar 7:00 atanga chawhma dar 11:00 thleng kai te, lo neitute leh in sakna lama thawkte pawh chawhnu ni nema thawhtir te, khawlaia inzur thin leh police-te pawh an intihdaihna tur tha zawk pekte an ti thei niin a sawi.
Ningani zan khan meteorological department hian ni nga lo awm leh tur chhungin India hmarthlang leh laili laite chu a lum hle dawn tiin orange alert a pe chhuak a. Heng hmunte hi khawvel huap pawha boruak a bawlhhlawh zualna hmun a ni hlawm a, April leh May vela ruah tlem, boruak tidai tur an dawn thin ang chu kuminah hian an la dawng lo hlawm a ni.

Khaw lum leh lungalhthei

Khaw lumah hian miin electric an hman nasat avangin indaih lohna a nasa thei a, hei vang hian power plant hrang hrangten lungalhthei an tlakchham mai loh nan mihring phur rel 42 zet chu an zin tur thulhtirin lungalhthei phur tlantir an ni.
Railways thuneitute chuan thermal power plant-a lungalhthei khawl sate a zo chak hle a. Railways chuan hma lain an nghei mai loh nan a phurtute chak leh awlsam zawka an tlan kual theih dan tur a ruahman tih an sawi.
Indian Railways-a executive director Gaurav Krishna Bansal chuan rel zin tur thulhtirte hi tlantir leh thuai tur an nih thu a sawi.
State tam takin an lungalhthei dah khawl an hmang zo chak hle a. Central Electricity Authority (CEA)-in a chhinchhiahnaah chuan thermal power station 165-a 56 chuan 10% pawh an nei tling tawh lo va, 26 phei chuan 5% pawh an nei tling lo.
Delhi Power Minister Satyendra Jain chuan power plant-ten ni khat daih pawh an kawl tawh loh thu a sawi a, ni 21 daih tal dah khawl thin kha a zo chak hle tih a sawi a. Power neih loh chuan metro leh damdawi inte pawh an buai dawn tih a sawi.
Lungalhthei tlakchham hlauhna avangin state sorkar tam tak chuan thil siam chhuahna hmunte pawh hna thawh hun bi tukin an hman an tihtlemsak tawh bawk.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427