Leicester City leh AS Roma an inhnehtawk
Italian team in hnehna chang haw a dinhmun tha luah thei an nih laiin an goal an hum tluan zo lova. Own goal chawiin 1-1 in Leicester City leh AS Roma te Europa Conference League semi-final ah an inhnehtawk.
King Power Stadium a first leg inkhelah hian Roma in first half a goal an khung chu an chakpui mai dawn a ang hman. Nimahsela second half-ah AS Roma defender Gianluca Mancini chuan an lamah a ti lut palh a. Foxes in beisei an la nei.
Tun season atang Europe huap inelnaah away goal hman a nih tawh loh avangin final lut tura chan tha zawk sawi theih a la ni lo.
Roma in minute 15-naah Lorenzo Pellegrini goal khung hmangin hma an hruai a. Nicola Zalewski thawhrah a seng.
Foxes in inkhel an thunun viau laiin goal hmaah erawh hlauhawm an siam tam tawk lo.
Second half-ah Harvey Barnes chuan Ademola Lookman hmu in a tan ball a cross a, hei hi Mancini chuan nang fuh hmasa zawk mahse an lamah a ti lut.
Leicester boss Brendan Rodgers chuan, “Kan kheltha viau in ka hria a, kan thunun zawk. Kan duhdan ang takin kan khel a, a kim lo awmchhun erawh an goal hmaah a ni a, kan hriam tawk lo.”
“Team tha pahnih paltlang tawh kan ni a, hei hian second leg atan inrintawkna lian tak min pe.” tiin a sawi.
Roma boss Jose Mourinho chuan, “Kan result kha kan phu ang a ni ang. Ball an chang tam a, mahse a tir atanga kan rin lawk a ni. Kan inrem nghet a, kan inveng tha. Duhthusamin nawr let rang lo thin mah ila kan rilru puthmang a dik hle.” “Khingpui tha, kan team laka danglam tak kan hmachhawn a, Rome a engkim chinfel a ni tur hi kan tan a tha.” a ti ve thung.
Inkhel dangah Dutch club Feyenoord Rotterdam in Olympique Marseille 3-2 in an hneh a. Goal hnihna hma an hruaina an hloh hnuah an chak leh hram.
Dutch club tan Cyriel Dessers leh Luis Sinisterra ten goal an khung hnuah Marseille in Bamba Dieng leh Gerson hmangin an sut a. Dessers bawkin second half tan tirah chakna goal a khung.