Aizawl: MNF Adviser Lalruatkima chuan Mara Autonomous District Council (MADC) inthlan campaign-in khaw hrang hrang a fanna thu sawiin, MNF chuan zu chhiah avanga hausak ai chuan zu chhiah tel loa retheih an thlang tih a sawi.
RD minister ni bawk Lalruatkima hian MADC inthlan lo awm turah MNF party mipuite an phur tih a hmuhin beiseina an neih san thu a sawi a. Tun dinhmunah state-a sorkar mek, MNF chu Mara mipuite tana malsawmna thlen theitu dik tak a nih thu a sawi.
Lalruatkima hian, “Congress sorkar khan zu an zuar a, hmeithai leh fahrah an pung nasa em em mai a ni. Sum harsatna phuhruk turin zu chhiah an it a ni. Keini MNF erawh chuan zu chhiah avanga hausak ai chuan zu chhiah tel loa retheih kan thlang a ni. Mi tam tak suattu zu zawrh hi tha kan ti lo a, kan titawp nghal a ni,” a ti.
Congress sorkar kha Zoram mipui tumah hian ngai zui an awm lo tih sawiin, “Phai lamah nen Mizoram lamah nen an hniam telh telh a. An president an thlak avangin mipuiin kan hmuh dan a danglam lo,” tiin, tuihna awm lo tuikhur ang chiah, hnemhnanna awm lo an ni tawh tih a sawi.
Ram neitute an sorkar takah ramri humhalh kawngah awmze neiin huaisen takin an kal mek tih sawiin, “MZP-in Zofate Chawlbuk an sa a, Assam lamin silai nen an kap a ni. Kan zirlaite khan chhantu an nei lo a, an lainatawm takzet. Tunah erawh chuan a tul dang ang anga ramri humhalh ngam sorkar a lo ding ta,” a ti a; MNF sorkar hian mau tam tam leh Covid hripui a hmachhawn tawhah chhuanchham an awm loh thu leh chhiatna nasa lutuk thleng loin hun harsate hi an paltlang mek tih a sawi bawk.
Mi rethei thleng phak policy siam thin an ni : Zodintluanga
MPCC Treasurer Zodintluanga Ralte chuan Congress chu Mara ram hmasawnna tur leh mi rethei thleng phak policy siam thin party a nih thu a sawi.
Siaha South II candidate KH Beihlo campaign office hawnna, Ningania neihah thu sawiin Zodintluanga Ralte hian, Mara mipuite’n duhsak taka Congress an vote tling thin chu lawmawm a tih thu a sawi a. “Congress party chu a thutiamah a ding nghet thin a, Mara ram hmasawnna leh mi rethei thleng phak policy pawh a taka kalpui thin kan ni,” a ti.
CLP Leader Zodintluanga Ralte hian MNF chu SEDP cheng nuai thum sem an tiam vanga sorkar niin, SEDP an kalpui mek dan erawh mipui chan loh khanah a lo chhuak thung tia sawiin, “SEDP vaimin chi an sem mek chu an kalpui dan a mak em em mai a, thlawhhma la miah lo mi eng emaw zat hnenah vaimim chi semin chhungkaw tam takin hmalak ngaihna an hre lo a. Ran chaw atana pek dawnin damdawi nena sawngbawl a ni bawk si, mihring ei tlakah an ngai bawk si lo,” tiin, vaimim chi dawng tam tak chuan tihngaihna hre loin an chawk let an chawk let tih a sawi.
“Vaimim chi an sem zawhah hian telhawng, kaikuang leh chengkawl te an rawn kalpui leh dawn ni awm tak a ni,” tiin, cheng nuai thum sem tura intiamte chet hmang atang hian MNF party rintlak loh zia a lang chiang hle tih a sawi bawk.
Zodintluanga Ralte chuan Congress party chu mipuiin hnawl chang nei mahse a tho chhuak leh thin tih sawiin, “Congress party chu insiam tha chho in President thar Lalsawta ho in kan tho kang leh mek a. ZPM leader Lalduhoma erawh a pawl awmna apiang mipuiin an la hnawl char char a, ZPM te hi Zoram mipui hnawl zin ber Leader hnuaia awm mek an ni,” a ti.