MNF Treasurer K Vanlalauva chuan Mizoram politics-ah MNF chu no hringtu, a pui ber a nih thu leh ramhnuai atanga chhuak party danga kalte zingah Leader hlawhtlingzui an awm loh thu a sawi.
Nimina Mizo Hnam Runa chhung inkhawm MNF in an neihah thu sawiin K. Vanlalauva hian “MNF hi Mizoram political party-ah chuan a pui ber leh no hringtu ber a ni. Pu Hawla pawh 1966 khan MNF-ah a tel ve a, kan fa hrin a ni. Pu Lalsawta pawh hi kum 1993 khan MNF ticket-in Aizawl South II-ah thlantlin a ni a. Kan fa hrin a ni tih a ngaihtuah chhuak fo mai thei,” a ti.
“BJP President Pu Hmuaka pawh hi MNF joint secretary lo ni tawh a ni a. ZPM leader Pu Lalduhoma pawh hi MNF general secretary lo ni tawh thin a ni,” tiin, ram roreltu leh hotu ni tur chuan nun inen uluk a ngai hle tih a sawi.
Party dang chungchang sawiin MNF Treasurer hian, “ZPM chu movement an nih lai chuan duh duh sawi a rem. Unit leh block neih tul ti lo, Chakma rama unit neih tul ti lo an nih kha. Party an nih hnuah chuan an thusawi thinte sawi a rem ta lo. BJP Northeast enkawltu pawhin nakum Mizoram inthlanah BJP kan sorkar dawn a ti. Awih a harsa a ni. Central-a Congress pawhin hruaitu an dap mek a, pawn lam miten hruaitu tur an dappui a ngai hial tawh a ni,” a ti.
“National party leh tualto party-ten an pa ber, MNF hi min rawn bei reng a. Mizoram sorkar hi sum enkawl thiam loa puhin min tihchhiat tum mah se, kum hnih chhung hripui avanga harsatna kan tawh karah leh central funding hmuh mumal theih loh karah essential commodity-a harsatna kan tawk miah lote hi sum enkawl that vang a ni,” tiin K Vanlalauva hian a sawi bawk.