Chelsea in an khingpui thunun hle mahse an hneh thei bik lova, Manchester United chuan an si phurh sut theiin 1-1 in an inhnehtawk.
Old Trafford-ah United goalkeeper David de Gea chuan save tha tak tak a siam ngun hle a, second half-a a team a chhanhim zawh tawh bik lo hnu lawkah United chhandamtu Cristiano Ronaldo inlar in an si phurh sutna goal a khung.
Mikhual team in first half hneh takin an thunun a, Chelsea in football an khel a, Manchester United in team mumal an nei ta lo ang maiin khelmual chhungah an tlan kual.
De Gea hian Kai Havertz leh N’Golo Kante lakah a team a chhanhim a. Dinglamah Chelsea wing-back Reece James chu inkhela a khaipa berah tangin Chelsea hlauhawm zawng zawng a ke atanga intan a ni zel.
Minute 60-naah goal a lut a, James-a siamsak atangin Marcos Alonso chuan goal a khung.
Chelsea erawh an lawm rei lo. Ronaldo-a’n mawhphurhna a la a, ball an thah leh hnu lawkah Chelsea by-line bulah a tlan luhpui. Blues defender-ten an dang chhuak a, United ‘throw in’ ah Blues inthlahdah zeuhin Nemanja Matic-a’n fing takin Ronaldo tan a pir lut a. Hei hi United tana tun season-a a league goal 17-na turin Portuguese forward in goal-ah kawh takin a khung.
Inkhel tawp thleng team pahnihten goal khung theihna huntha an nei ve ve a, mahse Old Trafford-ah draw result avangin United an lawm a, Chelsea in an huntha bawhpelh an ui.
Chelsea boss Thomas Tuchel chuan, “Zaninah point thum hmu tur kan ni a, ball kan chan lai leh kan kawl loh laia kan thawhrim danah ka lungawi. Penalty area chhungah kan vanduai deuh a, tih hram hramna kan tlachham deuh a ni mai thei. Mahse engtiklai mahin a dawih zawkah kan tang lova, kha kha thil lawmawm tak a ni. “ tiin inkhel a thlirlet.