Punjab-a Patiala hmun thenkhat chu Zirtawpnia Khalistan duh lohna kawng zawh neih laia pawl pahnih intihbuaina a chhuah avangin boruak a tang hle.
Police chuan mipui hnawh darh nan van lam hawiin silai an hmet puak hial a. Intihbuainaah hian mi pahnih velin hliam an tuar nia hriat a ni a, buaina chhuak zel tur ven nan zan dar 7:00 atangin Inrinni zing dar 6:00 thleng curfew puan a ni.
Punjab Chief Minister Bhagwant Mann chuan hetiang thil a thleng chu vanduaithlak a tih thu a sawi a, an state-a buaina siamtute chu tumah an hlah dawn lo tih a sawi.
“Patiala-a buaina chhuak chu a vanduaithlak tak zet a. DGP (police chief) ka bia a, boruak a muanawm tawh rih a. Kan vil reng a, kan state-a buaina siam chu kan chhuah dawn lo va, Punjab muanna leh inunauna hi a pawimawh ber a ni,” a ti.
District thuneitute pawhin mipuite chu zaidawh taka awm turin an ngen a, pawl hnih intibuaite pawh an inrem lohna leh inhriat thiam lohna an neihte chu inbiakna hmanga ching fel turin an ngen bawk.
Pawl pakhat, Shiv Sena (Bal Thackeray) nia hriatten kawng an zawh chu Sikh pawl pakhat, Khalistan lamtangte nen an intibuai a ni.
Pawl hniha mite hian ngunhnam an viluk a, lungin an intawng bawk.
Patiala District Commissioner Sakshi Sawhney chuan thuchhuah siamin, “Muanna leh inzah tawnna hi sakhaw tin laimu a ni a. Inrem lohna a awm pawhin inbiaa chin fel theih a ni a. District thuneitute chuan Patiala leh Punjab puma mite chu muanna leh inunauna keng nung zel turin kan ngen a. Boruak thunun niin vil zui reng a ni a. Muanna a awm theih nan hma kan la zel ang,” a ti.
Congress hruaitu, Rahul Gandhi chuan, “Patiala-a thil thleng ka lo hmu a, ramri state angah chuan muanna a awm hi a pawimawh hle a. Punjab sorkar pawhin dan leh thupek tha taka a kenkawh ngei ka beisei tlat a ni,” a ti.
Shiv Sena (Bal Thackeray) hian police hnen atanga phalna la hmasa lovin kawng an zawh niin police chuan an sawi tih NDTV chuan a tar lang.