Nimin khan Bhagwanth Khuba, Union Minister of State, Chemicals & Fertilizers & New & Renewable Energy chuan Mamit tlawhin DC Conference Hall-ah sorkar aiawh mi pawimawhte, khawtlang hruaitute leh tlawmngai pawl aiawhte nen an inkawm.
Inkawmnaah hian Mamit district chhunga hmasawnna scheme hrang hrang kalpui mekte thlir let a ni a. Sorkar hnathawkte chu hmasawnna atana hnathawk tur an nih angin scheme hrang hrangte a nihna ang taka kalpui a nih theih nana theihtawp chhuah tur leh zirchiang thin turin union minister hian a chah.
Mamit bialtu MLA Er. H. Lalzirliana pawhin thu sawiin Mamit district hmasawn zelna tur thil pawimawh tak tak a sawi.
Union minister hian Aspirational District Programme hnuaia hmalakna hrang hrang – Govt. Mamit Model MS I, Mamit, Mamit Anganwadi Centre – II leh LaQshya Certified Labour Room, District Hospital, Mamit te a tlawh nghal bawk.
Nimin vek khan union minister hian Bawngva khua tlawh nghalin, Anganwadi Centre II leh Govt. Bawngva UPS-a Teacher Hostel cum Quarter te a tlawh nghal bawk.
Union minister hi Mamit bialtu MLA bakah, DC, SP, sorkar official te leh khawtlang hruaitute’n lo dawngsawngin an tawiawm a. Aizawl atangin State Protocol officer leh official dangten an tawiawm bawk.