Tunlaiin naupangah kawthalo, luak, hritlang leh awmna vei an tam zual deuh a, damdawi ina an admit tam zual pawh hetiang ang natnain a tihbuaite an ni.
The Zozam Times-in sorkar damdawi in leh mi mal damdawi in hrang hranga doctor a biakpawpte chuan casualty-a an buaipui tam chu kawthalo, luak, hri tlang leh awmna vei an nih thu leh OPD pantu zingah pawh hetiang natnain a tihbuaite hi an tam tih an sawi.
Mizorama sorkar damdawi in lian leh pantu ngah ber tia chhal theih, Civil Hospital Aizawl (CHA)-a Paediatric OPD-a HOD Dr Lalchhuankimi chuan ni tin inentir zinga zaa 10 bawr vel chu kawthalo, luak leh khawsik tel an nih thu The Zozam Times a hrilh.
Awmna inentir pawh an tam thu sawiin, “Ni tin rawn inentir zinga zaa 20 atanga 30 bawr vel hi chu awmna an ni a, tunlai hian a hluar deuh chu a ni ber,” a ti.
CHA-a Paediatric ward-ah pawh kawthalo, luak, hritlang leh awmna vei admit an tam thu sawiin, zan khatah mi panga atanga parukte an admit chang a awm tih a sawi.
Dr Lalchhuankimi chuan naupang kua a that loha a luak emaw, a khua a sik emaw a nih chuan mahni ina duh duh damdawi pe mai loa damdawi in pan vat a him thu a sawi a, “Doctor-ten an awm dan azirin damdawite kan lo pe ang a, admit ngaite pawh kan lo enkawl vat mai dawn a ni,” a ti.
Damdawi ina hruai an nih hnua damdawite an ei hnua pawha naupangin thil a la ei theih loha a khua a la sik zela, a ekte a thi chho a, nikhawhrelo emawa a awm tawh chuan buaipui vat a ngai tawh a ni tiin, hetiang thil a thlen chuan nunna chhan nan damdawi in a rang lama pan leh vat tur a nih thu a sawi.
Department of Paediatric-a Senior Consultant Dr Lalrochhuanga chuan pneumonia avangin thihna a thleng reng a, hemi pumpelh turin naupangin awmna a neih chuan doctor rawn vat a tul thu The Zozam Times a hrilh.
Dr Lalrochhuanga chuan naupangin pneumonia an vei leh vei loh hriat dan hetiang hian sawiin, “Thla hnih hnuai lam chu a thaw ran dan chhiar a, minute khata vawi 60 aia tam a thawk chuan a thaw a rang tihna a ni a, thla hnih atanga kum khat thleng minute khata vawi 50 aia tam an thawk chuan pneumonia an vei tihna a ni,” a ti.
Kum 1 leh kum 2 inkar pawh minute khat chhunga vawi 40 aia tam an thawk chuan an thawk a rang hle tihna a ni a, pneumonia an ni tlangpui tiin, thawhah chu ina inenkawl dan a awm lo a, damdawi ina enkawl ngei an ngai tih a sawi.
Naupangin an taksaa harsatna an tawh chungchangah nu leh pa thenkhatin sepcialist doctor kher pan an tum thin chu thil tha lo a ni tiin, “Thawhah kan tih leh natna dangah pawh nise specialist kher lo doctor pan vat mai tur a ni,” a ti.
Tun hnaiah kawthalo, luak, hritlang leh awmna vei tam zual deuh mah se heng natna hi a hluar ta vak tihna erawh a ni lo tih paediatric hotute chuan an sawi a; thlasik lai ai chuan a tam zual deuh tihna a nih thu an sawi bawk.