Aizawl: Sorkar flagship programme, SEDP chu a mamawhtute inchhungkhur thleng phak tura inbuatsaihna kalpui mek a ni tih MNF Adviser Lalruatkima’n a sawi.
Siaha Press Club-a nimina thu thar theh darhtute a kawmnaah Lalruatkima hian SEDP chu Covid-19 hripui avanga duh anga kalpui theih loh a nih hnuah tunah hian kalpui tan turin ruahman a nih tawh thu a sawi a. Tunah hian mamawhtute inchhungkhur thleng phal (family beneficiary oriented) turin inbuatsaih kalpui mek a nih thu a sawi.
SEDP hmangin Zoram tan hna hna nasa takin thawh a nih tawh thu sawiin, “Kawng siam nan te, kawngchhia thawm that nan te, Infrastructure development atan nasa tak hman a ni tawh a. Manpower development atan hman ni bawkin zirtirtu sang chuang SEDP hmangin lak an ni bawk a. Hei bakah hian Health care lam atan te, Social Security lamah, de addiction leh rehabilitation centre siam nan te hman a ni,” a ti a. SEDP pilot project atan chhungkaw 2000 sericulture leh vety-ah kalpui a nih tawh bakah horticulture leh agriculture-ah pilot project atan lo kalpui a nih tawh thu a sawi bawk.
MNF adviser hian an sorkarin hri leng karah pawh MADC area-ah hma a lak nasa tawh thu leh MADC-a hmasawnna nasa lehzual zawk a thlen theihnan mipuiten MNF party sorkar din ngei an duh tih sawiin, “Lai Autonomous District Council leh Chakma Autonomous District Council mipuiten state-a sorkar lai party ngei thlan thatna leh hlawkna an hria a. Tunah hian LADC leh CADC-ah MNF sorkar chak takin a ding mek a. Mara District Council mipuite pawhin state-a sorkar lai ngei hi an thlan tlin kan duhin kan beisei tlat a ni,” a ti.