India rama car siamtute chuan April thlaa an inhralh dan dinhmun an tichhuak leh ta a. Company thenkhat chuan lirthei siamtu tam takin harsatna an tawh, chip indaihlohna avangin an lirthei hralh a tlem thu an tarlang a, company thenkhat erawh chuan kum hmasa nena khaikhin a let te an hralh thung a ni.
Tun tumah hian company hlun tak tak panga – Maruti Suzuki, Hyundai, Tata leh Mahindra te kan tarlang dawn a ni.
MARUTI SUZUKI
Maruti Suzuki hian thla hmasa khan lirthei 1,21,995 an hralh a. Nikum April thla nena khaikhin chuan zaa 10.22 in an lirthei hralh zat hi a tlahniam a. Nikum April thla khan Maruti hian lirthei 1,35,879 an hralh a ni. Thla hmasaa an hralh zat nena khaikhin pawhin Maruti Suzuki hian an lirthei hralh zat chu zaa 8.86 in a tlahniam tih an tarlang bawk. An tlahniam anga kan tarlang chung hian lirthei hi an hralh hnem viau a ni.
Maruti Suzuki lirthei man tlawm, entry-level car an tih ho Alto leh S-Presso te hralh zat a tlahniam hret a. An compact segment cars hrang hrang Baleno, Celerio, Dzire, Ignis, Swift, Tour S leh WagonR te pawh a hma nena khaikhin chuan hralhchhuah zat hi a tlahniam a. Maruti hian April thla khan compact car 9,184 an hralhchhuah laiin nikum April thlaah chuan 72,318 an hralhchhuak thung a ni.
HYUNDAI
South Korea company Hyundai hian semi-conductor chip leh part indaihlohna chu an tuar hle a, hei hian an lirthei hralhchhuah zat leh an siamchhuah zat thlengin a tihniam a ni. Hyundai hian zaa 10 April, 2022-a lirthei an hralh zat hi a tlahniam tih an tarlang a. Hyundai hian thla hmasa khan lirthei 44,001 an hralh a, nikum April thla khan lirthei 49,002 an hralhchhuak thung a ni. Month on Month sales lamah pawh a thla hmasa chiah, March 2022 khan lirthei 44,600 an hralh a, April thlaa an hralh zat hian a tluk lo a ni.
Ramchhunga Hyundai in an lirthei an hralh zat hi tlahniam mahse India ram atanga an thawnchhuah erawhah hmasawnna an hmu thung a. Hyundai hian India ram atangin thla hmasa khan lirthei 12,200 an thawnchhuak a, nikum April thla khan lirthei 10,201 an thawnchhuak thung a, thla hmasa a pun zawkna hi zaa 19.60 a ni.
TATA
Tata hi an che tha khawp mai a, nikum April thla aia kumin April thlaa an lirthei hralh zat tam zawkna hi zaa 66 lai a ni a. Tata hian thla hmasa khan lirthei 41,587 (passenger car) an hralhchhuak a, nikum April thla khan lirthei 25,095 an hralhchhuak thung a ni. Hetihrual hian March 2022 nena khaikhin erawh chuan April 2022 a an hralh zat hi zaa 1.67 in a tlahniam thung a ni.
Tata hian April 2022-ah internal combustion powered car (petrol leh diesel hmang lirthei pangngai) 39,265 an hralh a, hei hi nikum April thla aiin zaa 60% in a pung a. Electric hmang lirthei hoah chuan Tata hian thla hmasa khan lirthei 2,322 an hralhchhuak a, nikum kha chuan April thlaah vek khan electric hmang lirthei 581 an hralhchhuak thung a ni.
TOYOTA
Toyota pawh hi nikum nena khaikhin chuan an lirthei hralh zat hi April 2022-ah khan 57% laiin a pung a. Toyota hian thla hmasa khan lirthei 15,085 an hralh a, nikum April thla khan lirthei 9,600 an hralh thung a ni. Hetihlai hian kumin March thlaa hralhchhuah zat aiin kumin April thlaa hralhchhuah zat hi zaa 11.94 in a tlahniam thung a ni. March thlaah khan Toyota hian lirthei 17,131 an hralhchhuak a ni.
MAHINDRA & MAHINDRA
Mahindra hian kumin April thlaa an passenger car hralhchhuah chu nikum nena khaikhin zaa 23 in a sang tih an sawi a. Kumin April thlaa lirthei 22,526 an hralh a, nikum April thla khan lirthei 18,285 an hralhchhuak thung a ni.