- Mahmuaka Chhakchhuak
Zoram Politics kalphungah thil thar leh danglam tak rawn awm nia lang chu Congress Party President chuan tuna an MLA neihsa 5-te nilo bial 35-ahte hian tumahin mahni dinna tur anga chei a lo vil lo tura hriattirna an chhuah hi a ni. A hun takah hruaitute’n bial vil turte hi an la rawn ruat mai tur thu an thuchhuahah hian kan hmu bawk a, bial mipuite nena inbe khawmin uluk taka an la ruat mai tur thu sawi a ni a. He an thuchhuah ang hian Party dangte chuan thuchhuah an nei ve chiah lo nia hriat a ni a, hei vang hian hei hi Congress Party-in a thatpui dawn nge a thatpui lo zawk dawn ni ang tih chu Vote thlak niah ala hriat mai turah ngai ila a tha ang e.
Kan ram Politics kalphung hrim hrim hi buaithlakna deuh a awmin ram dang leh hnam dangte aia danglamna bik kan neih pakhat langsar tak chu Party mi leh sa induhsak bikna hi a ni awm e. Hei hi keimahni puala ram hruaitu kan thlan tanna kum 1972 atang daih tawha kan neih tawh ni pawhin a hriat a, rorelna hmun sang (Assembly House) ah ngei pawh lantir alo ni fo tawh thin bawka hriat a ni. Kum 1986 ah Interim sorkar a lo piang a, Sept. 2 – 5, 1986 ah Assembly Session neih a nih khan Chakma Autonomous District Council thiah chungchang chu ngaihtuahna neih a niin House-a puluttu PC Party MLA 8-te chuan Politics thila inphiarrukna avangin kum 1972-a Chakma Autonomous District Council lo piang hi paih bo a, Mizoram chhunga Tribal-te January 21, 1972-a an dinhmun ngaia dah leh turin he House hian Government of India ngen ni rawh se tih chu ngaihtuahho turin an pu lut a. Thil tha tak nia ngai a, pass mai tura an ngaih laiin Party dang MLA-te chuan chhuanlam chi hrang hrang siamin an hnial a, pass a ni ta lo a nih kha.
Hetiang thil hi vawiin thleng pawha la thleng reng a nih avang hian thil tha takah pawh a rawttu lam tam leh tam loha innghat zawk anga a lan thin avangin thuthlukna tur hi sawi lawk theihna chen pawh a awm thei awm e. Tun session hnuhnung berah pawh khan (Feb. 25, 2022 niin) Private Member Bill – The Mizoram Private Transport Workers (Welfare) Bill 2022 chu put luh a niin pass a nih lohna chhan kha a that lohna pawh chuti taka sawi a ni lo nain a duh tu leh duh lo tu member intamhleih vang a ni berin a hriat. Hetiang hi House chhunga thil thleng fo a niin hun dangahte pawh thil dang tam takah hriattur a awm tawh thin bawk ang a. BPL Card chungchangahte hial pawh Party induhsak bikna hi awma sawi a ni. Titia hriat danah phei chuan tuna SEDP sem turah ngei pawh hian Party dangte chuan an dawng ve kher pawhin a rinawm chiah lo a, an lo dawng ve a nih chuan thil lawmawm tak a ni ang.
Hetiang karah hian Congress Party President chuan bial vil chungchangah thuchhuah danglam tak a rawn neiin reiloteah bial viltu tur chu ruat ala nih dawn thu tarlan a ni nghal bawk a. Hei hian Politics-ah rahbi thar min kai tir dawn nge dawn lo tih hi hriat a chakawm hle a ni. Jan 24, 2022 nia Mizoram Pradesh Congress Committee President, Pu Lalsawta thuchhuah hi chik taka ngaihtuah chuan Party leh mipuite ngei pawhin kan chhiatpuina tur ai chuan kan thatpui zawkna tur hi a tam tura ngaih a ni a, a chhan pawh tum dangahte chuan rei tak bial an lo vil tawhin midang tana luh remchang tawh lo hial tur bial engemawzat an lo neih tawh thin vang hian a ni. Chungte chu an tling ngei ang tih chu rin har takte an la ni hlawm bawk nen hian Party leh mipuite ngei pawhin kan chhiatpui mai zawk awm mange tih tur hi an ni lehnghal a.
Bial vil avanga keipui sahauh bur ang chi hi kum tam tak kan lo kalpui tawh a niin kan thatpuina sawi tur awm tho mahsela thenkhatahte chuan kan lo chhiatpui zawk nia hriat a ni bawk a. Bial mipuite ngei pawh hian Party hruaitute nena inbe tlanga duhthlanna hun an neih tur hi thil tha tak a ni thei bawk ang. Party hruaitu lamin an duh duh an rawn dah mai a, bial mipui ngaihdan lak an tum loh phei chuan thil buaithlak tak tur a ni a, tuna Pu Sawta’n bial mipuite ngaihdan lak a nih tur thu a sawi tel bawk hi zoram Politics-a thil thar a ni kan ti lo thei lo ang. Amaherawhchu thil thar hi kan thiam loin kan zo lo ang em tih chu hriatthiam har tak a niin tuna Pu Sawta thuchhuah ngei pawh hi mipui tam tak chuan kan hrethiam kher lo mai thei a. A awmna Congress Party-ah ngei pawh hian tunah MLA 5 an neiin annite chuan an bial ngai lo vil chhunzawm zel turah han ngai ta ila, bial dang 35-ahte chuan mi thar hmel duhawm tak tak pawh kan hmu hlawm dawn ni awm tak a ni.
Congress Party-ah ngei pawh hian ding tawh lo tura mipui lamin kan duh zawk hi an lo awm mai thei a, chutih laiin anmahni erawh chuan din an la tum tho avangin taima takin bial an lo la vil ve reng pawh an lo awm thei reng a. Chutiang karah chuan khauh taka President berin hetianga thuchhuah a nei hi an Party ngei pawhin an thatpui zawk a rinawm a, Party dangte pawh hian entawn thei hial sela a duhawm a ni. Bial vil mektu thenkhatte chuan sum leh pai pawh an lo seng teuh tawhin hun rei tak chhung an lo vil tawh pawh a ni thei e, nimahsela bial mipuite ngainat vak loh leh tling zo kher tur pawha an rin loh hi a awm ve theih avangin tuna thuchhuah kan hmuh leh hriat hi thil tha tak niin a lang. Mipui vote hmanga tlin tur a nih tlat avang hian sum leh pai ngah emaw tawngkam thiam leh thiam loh pawh hian kawngso a su ber lo a, mipui ngainat leh duhna avanga vote an thlak theihna tura awm thiam hi a pawimawh ber mai awm e.
Green signal hmu tawh an ti emaw ni, ngaihtha taka bial lo vil ve tawh tute hian thahnemngai takin lo vil mek mahsela anni aia tha leh bial mipuite ngei pawhin an thatpui zawk tur mithar duhawm tak an la rawn awm theih avangin lo kian ngam tura ngenna pawh Pu Sawta thuchhuah hi a ni thei bawkin a rinawm. Tunah ngei pawh hian bial chhung mipuite ngei pawhin tling zo tura an ngaih loh leh midang ding zawk sela tia an sawi hi Party thenkhatahte chuan an awm ni awm tak a ni a, chung mite chuan Party hruaitu lam atang pawha thlak ngam loh tur khawpin sum leh pai an lo seng tawh pawh a ni thei. Nimahsela tuna Pu Sawta thuchhuahah erawh hi chuan last minute-ah ngei pawh midang an la rawn dah theih avangin mahni lo indah pawimawh mai chu a tawk dawn hauh lo tih chiang takin a ti lang thei awm e. Chuvangin politics-a bung thar kan kaina turah ngai ila ilo thlir zel phawt mai ang le.