NBA champion lai Milwaukee Bucks tan an star Giannis Antetokounmpo bawk chu an chhandamtu a ni a. Tunlai NBA a player tha ber a mi tam takin an chhal Greek player hian a team hi 101-89 in Boston Celtics lakah a chakpui.
Eastern Conference semi-finals game 1-ah hian Antetokounmpo hian NBA chanchin a playoffs ah a triple double vawi hnihna neiin a team hmahruaitu a ni a. Fourth quarter-ah thiam taka defense khel thin Boston player-ten NBA MVP vawi hnih ni tawh hi uluk taka an veng chungin Giannis hian ‘board’ ah ball vawmin a per let chu a ‘dunk’ thova. Shoot-na tur hmun an siamsak miah lo pawhin point a score tho.
Minute 38 a inkhelh chhungin point 24 a score a, assist 12 neiin rebound 13 a la bawk.
Bucks tan Giannis-a thachhangdawltu Khris Middleton chu a inhliam avangin Celtics nena an series khelhah a inlan hman a beiseiawm lova. Mahse an point guard Jrue Holiday chuan Giannis hi thlawp tha in point 25 a score a. Bobby Portis chuan 15 a thawh bawk.
Celtics star player Jayson Tatum chuan point 21 leh assist vawi 6 a nei.
Western Conference semi-finals game 1-ah Golden State Warriors in team naupang hmuhnawm Memphis Grizzlies chu an hmachhawn a. 117-116 in Memphis-ah hnehna an chang.
Season tawp lam leh tun NBA Playoffs an tan chho chiah a kheltha Warriors tan Klay Thompson chuan second 36 a la awmin 3 pointer pawimawh a lut a. Nidanga an shooting tha ang an tluk loh zanah pawh Warriors an chak.
Golden State tan team khaipa Draymond Green chu first half-ah flagrant foul avangin chhuah tir a ni a. An inkhel kaihruaitu zing ami awm lo mahse Warriors an chak.
Jordan Poole chuan bench atangin point 31 a score a, NBA Playoffs a point a score tam ber tum a ni a, Curry-ah 24 a thawh thung.