India ramah hun eng emaw chen Covid-19 leng dinhmunin ziaawm lam a pan hnuah endik zinga hri kai hmuh chhuah zat bi (positivity rate) chuan 1% a kai leh ta a, thla hnih chuang a kai tawh loh hnuah he dinhmun hi a tawng thar leh.
Tar lan tawh thin angin India-ah hian hri leng hian zual lam a pan leh hret hreta ngaih theih a ni a. Darkar 24 liam ta chhung pawh khan hri kai mi 3,157 hmuh chhuah leh niin mi 26-in an thihpui leh hman tih union health ministry-in a chhinchhiahnaah tar lan a ni.
Ni nga chhung a zawnin hri kai hmuh chhuah hi mi 3,000 chuang an ni leh tawh a. Mi 4,30,82,345-in hri hi kai tawhin mi 5,23,869-in an thihpui tawh bawk.
Darkar 24 liam ta chhung hian hri kai zinga enkawl dam aiin a kai hmuh thar an tam zawk avangin mi 408-in enkawl mek zat an pung leh a, mi 19,500 an kai leh tawh.
Ni khata sample endik atanga a kai hmuh zat bi (daily positivity rate) chu 1.07% a ni a, thla hnih chuang hret hnuah 1% chung lamah a kai leh ta tih ministry chuan a sawi a. A kai hnuhnung ber chu February 27 kha niin 1.11% a ni.
Chawlhkar khat liam ta chhunga endik zinga a kai zat (weekly positivity rate) erawh a la danglam tam lutuk lo va, 0.70%-ah a la ding mek a; mahse, zawi zawiin a kâng hret hret tho.
Positivity rate an tih hi miin coronavirus an kai leh kai loh endik zawng zawng atanga a kai hmuh zat bi a ni a. A san chuan inkai darh bi a sang ve zel tihna a ni.
Darkar 24 liam ta chhunga Covid-19 avanga mi 26 thi zinga mi 21 zet chu Kerala-a mi an ni.
Health ministry-in a chhinchhiah dan chuan hri kai hmuh chhuah tawh zawng zawng atanga chhutin enkawl lai mek hi 0.05% chauh an ni a. 98.74% chu enkawl dam an ni tawh.
Hri kai hmuh tawh zinga enkawl dam tawh hi mi 4,25,38,976 an tling tawh a, 1.22% an ni mek.
Nikum January 16 atanga invenna pek beihpui thlak kal mek zelah vaccine dose vaibelchhe 189.23 chuang pek a ni tawh bawk.