Weather office chuan India ram chhung hmun hrang hranga khaw lum uchuak tak chu a ziaawm tan dawn tih Thawhtanni khan an sawi a. Nipui tak tak intan hmaa kum tam tak hnua a lum ber tum an tawn mek laiin Delhi-ah ni thum lo awm leh tur chhungin ruah tlem tlem a sur dawn niin an sawi lawk bawk.
India Meteorological Department-a senior scientist RK Jenamani chuan India ram hmun tam zawka khaw lum uchuak tak chuan a tawp lam a pan tan thei niin a sawi a, heng zingah hian Delhi, Punjab, Haryana leh Uttar Pradesh pawh a tel.
“Odisha leh Bengal-a khaw lum chu kan sawi lawk angin April 30 khan a tawp tawh a. Ni hnih thum chhungin thli chak tak a lo thleng ang. Hmarthlang lamah pawh khawthlang lam atanga thli lo kal tur avangin ‘yellow warning’ pek a ni a. Delhi chuan ruah an dawng dawn a, a tam ber chu May 3-ah a sur ang a. Rajasthan, Delhi, Haryana leh Punjab pawh ‘yellow alert’ pek niin naktuk (Thawhlehni)-ah thli chak tak a thaw thei a ni,” a ti.
Khawthlang lam atanga thli chak tak kal reng bakah hian ni ruk ni sarih lo awm tur chhungin khawchhak thli a tleh dawn bawk a, khaw lum lam a sang vak tawh dawn lo niin Jenamani chuan a sawi.
“Hun khirh takah hahdamna a lo thleng a. Khaw lum uchuak hi May 7 thleng chu insiam leh tur a awm thei tawh dawn lo va. May 7 hnu lam tur erawh kan sawi lawk chiah thei lo va, khaw lum lam pawh sawi a har rih a; mahse, tun dinhmun atanga thlir chuan May thla dinhmun hi a tha,” a ti.