Aizawl: Kum 2021 chhung khan Mizoramah Tuberculosis (TB) vei hmuh chhuah 1,749 an awm a, chung zinga za zela 90 chu tihdam an ni a; TB vanga thi 72 an awm.
Nimin khan Secretariat Administration Wing, Conference Hall, MINECO-ah State TB Forum meeting vawi thumna neih a ni a, he huna an tar lan danin, kum 2021 chhung khan TB vei rinhlelh mi 4,084 endik an ni a, mi 1,749-in an vei tih hmuhchhuah a ni.
MDR-TB vei mi 114 hmuhchhuah niin, TB leh HIV vei kawp mi 289 hmuhchhuah an ni a. TB vei zaa 90-te tihdam niin,TB vanga thi mi 72 an awm.
Kumin January thla atanga March thla thleng khan TB vei mi 465 hmuh chhuah an awm tawh bawk niin meeting-ah hian tar lan a ni.
He thutkhawmah hian nikum chhunga TB programme hmalakna hrang hrang te, TB case hmuhchhuah dan te tar lan a ni a. TB damloten District TB Centre, Falkawn an panna lama an senso te, damlote veivahna zangkhai zawka phuhruk a nih theih dan tur te, Aizawl atanga District TB Centre, Falkawn bus service awm theih dan turte bakah Aizawl khawpui chhunga District TB Centre sawn hnaih chungchang te ngaihtuah a ni.
District TB Centre tina X-Ray khawl la bun fel lohte a rang lama tihfel a nih theih dan turte sawi niin, TB laboratory thar, C&DST Laboratory, Falkawn chu a taka hman theih a nih hun tur chungchang te sawi ho a ni.
Covid hri a ziaawm zel avangin a endik nana hman, Truenat khawlte chu National TB Elimination Programme hnuaiah TB test-na tura hman a nih theih nana hmalak dan turte sawi ho a ni bawk.