Netherlands-a mipa naupang kum li mi lek chuan a nu car la chhuaka khawlaia a chetsualpui hnuah khawvela car intlansiak ngaihhlut hlawh ber, Formula One-ah hmabak êng tak a nei dawn niin titi a leng.
An ram laili, Utrecht khawpuia police chuan Inrinni khan naupangin lirthei inhung dar pahnih a su leh a pyjama chauh haa ke lawnga a kal zui an hmu a ni.
A bul hnaia lo awmte chuan khawlai vawt taka naupang kal ta mai leh thil thleng an hmuh chuan police an hriattir a ni.
A nu car a lek chhuahnaah hian tumah hliam an awm lo va, police chuan Instagram-ah tun laia Dutch Formula One driver ropui ni mek, ‘Max Verstappen-a thar’ an chhar chhuah thu an tar lang.
Police-in an tar lan dan chuan Inrinnia a chhun mu a harh chuan a pain hnaah a lo kalsan a, a nu car chabi lain a inkhalh chhuak ta a ni.
Amah la tura officer-te koh an nih hnuah an in bul maiah chuan a nu car bakah car dang pahnih a sut chhiat an hmu ta a ni.
Car a khalh chhuah hi a nu hminga ziah luh a ni a, a nu pawh an ko ta vat a. Police-te hian lirthei chu khalh thiam tak tak lo mah se a chet dan vel chu a ang hle niin an sawi.
Mipa naupang hi police station-ah lak niin chocolate leh teddy bear an pe a, a nu hnenah an hlan zui a ni.
A nu ho hian chetsualna thlenna hmuna an kal leh chuan a tih dan vel an zirtir leh a. A nuin a tih thin angin chabiin car kawngka a hawng a, a tinung a, a kein a clutch leh a tihkalna a tlawh ve mai a ni tih police hian an sawi.
Officer-te hian a nu leh pate chu tun hnuah chuan an lirthei chabite dah fimkhur tawh turin an hrilh.
“Max Verstappen-a thar chu Utrecht daia Overvecht-ah hmuh a ni,” tiin police hian an tar lang a ni.
“Vanneihthlak takin driver te chi inkhalh chhuak hi chhiatna tenauin a tawp a ni,” an ti bawk.