Philippines khawpui, Manila bula in eng emaw zat kangah naupang paruk telin mi pariat an thi tih tual chhung thuneitute chuan an sawi.
Kangmei hi an ram sanaa Thawhtanni zing dar 5:00 (India-a zing dar 2:30) vela chhuak tan nia hriat niin chenna in 80 a kang chhia.
Kangmei hi Quezon City an tiha University of the Philippines campus hung chhung, mi tam tak an chenna in pakhata chhawng hnihna atanga chhuak tan a ni.
A kan chhan ber erawh hriat a la ni lo.
Senior fire officer Greg Bichayda chuan a thelh mih nan darkar hnih dawn hun an hman thu AFP news agency a hrilh.
“Rang takin kangmei hi a inman kai a ni,” a ti a. Thite chu an tan an in tlanchhuahsan ngaihna a awm lo hlawm niin a sawi bawk.
Thi zinga paruk chu naupang an nih thu Bichayda chuan a sawi a; mahse, an nihna chiang leh kum zat a sawi lo.
“Inte hi thil zangkhai tak taka sak an ni hlawm a, kangmei a chhuah khan a chengte chu an phili ta ruai a ni,” a ti.
“Kan station pawh a bul hnai lawka awm ni mah ila min rawn hriattir vat thei pawh an awm lo a ni,” a ti bawk.
Philippines hi khawvela mihring an bit berna ram zinga mi a ni a, an khawpui hi kilometre khat biala mihring cheng tamna ber a ni bawk.
Metro Manila an tih, an khawpui ber leh a chhehvel, tuna kangmei chhuahna, Quezon pawh huamin, hetah ringawt hian mi maktaduai 13 chuang an cheng.
Veng thenkhat phei chu a bit zual em em a, kangmei a chhuah pawhin insaseng ngaihna a awm hlawm lo.