BJP chu sakhaw tihbik nei lo party an nih thu leh Prime Minister Narendra Modi sorkarah Kristianten duhsakna nasa taka an chan thu sorkar laipuia Minority Affairs Minister John Barla chuan a sawi.
Mara Autonomous District Council (MADC) inthlan tur atana campaign-a Siaha châm mek, Barla chuan ECM Kohhran, College Veng Biak Inah kohhran leh khawtlang hruaitute kawmin thu a sawi a. Kristian a nih avangin Mizoramah a tlangnel nghal thu sawiin, “Prime Minister Narendra Modi sorkarah Kristianten duhsakna nasa tak kan chang a, kei ngei pawh Kristian minister dinhmun pawimawh takah min dah a ni,” a ti.
“BJP hi sakhaw tih bik nei lo party kan ni a, Kristian minister ka nih angin in duh leh mamawhte ka hnenah lo thlen ula, keiin prime minister hnenah tihhlawhtlin a nih theih nan ka lo bawhzui zel dawn a ni,” a ti bawk.
Union minister hian Mizoram mipui mamawh lo dawngsawng tura a inpeih reng thu sawiin, mamawh an neihte chu direct-a a hnen a thlen tura hrilhin, “State sorkar hnenah in mamawh ang pek ka duh thu ka sawi ang a, an lo tikhawtlaiin an lo hnawl thiang tawh lo ang. Thingkung thaa kan lawn chuan thei rah tha kan lo thin ang hian India mipuite tan Narendra Modi hruai BJP sorkarah hian rah tha lawh tur a awm a, chu ngei chu Mizoram mipuite leh MADC mipuite lawnna tur a ni,” tiin, chumiah chuan rah tha lawh tur a awm tur thu a sawi.
Barla chuan kohhran leh NGO hruaitute nena inkawmna hun tha leh duhawm tak an nei thei chu lawmawm a tih thu a sawi a. An mamawh an thlen thilte chu Delhi atanga a lo bawhzui tur thu a sawi.
Central minister hi Assam MP Kamakhya Prasad bakah BJP State President Vanlalhmuaka leh party hruaitu ten an tawiawm a ni.