- Rinfela Zadeng
Amercian thu leh hla thiam Mark Twain chuan – eng ang pawhin inchei u la, thinlung tha tak nei rawh u – tiin a lo sawi a. Incheina leh mihring nun hi inzawm tlat a ni a; kan rilru tarlangtu pakhat a ni. Incheina hmanrua chu – a hak chi te, a bun chi te, a hnawih chi te, a beh chi te leh a dang te pawh a ni thei ang. Zirlaite leh incheina chungchang hi tun tumah hian kan sawi dawn a ni.
Incheina awmzia
New York Times chanchinbua thlalatu Bill Cunningham chuan- incheina chu khawvel hrehawmna laka kan inhumhimna hriamhrei a ni – tiin a sawi a. Incheina hi mihring saruak khuhtu a ni a, kan mizia leh kan rilru puthmang thlenga tarlangtu a ni bawk. Kan incheina chuan kan zahawmna a keng tel a; kan nun vawngtu pakhat niin mi min hmuh dan thlengin a hril a ni. Pawn lama kan lan dana mi min tehna langsar tak pakhat pawh kan incheina hi a ni awm e.
Zirlaite leh uniform
Zirlai te hi uniform ha leh hak ngai tawh lo kan awm a; kan uniform hi kan nihna tilangtu pakhat a ni bawk. Kan incheina leh kan thawmhnaw hak atangin kan nihna hi miin an hre thei a, zirlai naupang uniform ha chu mi zawng zawngin kan nihna an hre nghal thei. Amit Kalantri chuan – Sipai uniform ha leh sikul naupang uniform ha te hi kan ramin a mamawh dan a inchen chiah a ni- tiin a sawi. Uniform hak ngai tawh lo zirlai kan nih pawhin kan incheina a zirin miin kan mizia leh kan hmalam hun tur thui tak an ngaihruat thei a. Chuvangin zirlaite hian kan incheina uluk hi a pawimawh hle.
Zirlaite leh kan incheina
Kan chhungkaw dinhmun zir loh vang ni loa duhdah leh tawp taka thawmhnaw ha thin zirlai kan nih chuan, kan pawnlam lan dan mai piah lamah kan chhungril thlenga kan rilru puthmang pakhat tarlangtu a nih avangin zirlai tha tak leh mahni invawng tak kan ni lo tih hi thil chiang sa a ni. Zirlai, mahni tawka invawng fai, incheina uluk leh zahawm taka inchei thin te chu pawn lam leh chhung lamah pawh belhchian an dawl ngei ngei thin.
Lepler taka inchei thin zirlai, maksak leh dangdai taka inchei thin te hi mi hlawhtling leh chhawr zui tlak an tlem hle awm e. Chutianga inchei thin zirlai chuan an zirlai aiin incheina an ngaipawimawh zawk ti ila kan sawisual awm lo ang. Zirlai hlawhtling, ram leh hnamin a chhawr tangkai te hi an incheina thu-ah pawh an zahawm nge nge thin. Chuvangin kan incheina atang rinhawt pawh hian eng ang zirlai nge kan nih tih hi a langchiang hle a; kan hmalam hun tur hi kan incheina atangin a lang nghal thei a ni.
Zirlai hlawhtlin tum, ram leh hnam tana chhawr tlak leh mi dangte tana malsawmna ni khawpa zirlai hlawhtling ni tur chuan vawiina kan inchei dan atang hian bul kan tan tur a ni. Incheina zahawm leh keimahni min vawng tur thawmhnaw haka, taima taka lehkha zir hi zirlai kan nih chhunga kan tihtur pawimawh ber leh awm chhun a ni. Incheina zahawm lo leh lepler taka inchei thin zirlai kan nih chuan, kan hlawhtling ngai dawn lo tih hi i hre sa ang u.
Zirlai kan nih chuan kan incheina chu a man a to loin a tha tawk lo pawh a ni thei e. Mahse incheina zahawm leh pangngai, kan zahawmna vawng him tura incheina satliah hi a awm tih kan hre vek awm e. Chutianga inchei thin zirlai te chu a tawpa hlawhtlinna rah duhawm tak chang tute pawh an ni thin. Ram leh hnam, chhungkua leh kohhran te innghahna chu keini vawiina zirlaite hi kan ni a, kan mawhphurhna san zia leh ropui zia hi hre reng ang u. Kan incheina aia zirlai ngaipawimawh, fel leh fai taka inchei thin, zahawm taka mahni nun vawng thei tur incheina inbel thin zirlai nih tum ang u.
Italian fashion designer ropui Gianni Versace chuan – incheina larleh chhuak thar apiang pak huam zel lo la. Incheina hi in thunun tir lo la, i incheina chu nangmahin thunun la, i thawmhnaw hmangin eng nge sawi duh leh i nun duh dan tilang zawk rawh’ tiin thurawn min pe a. Kan incheina atanga bul tanin zirlai hlawhtling, Pathian malsawm tlak ni turin zirlaite hian tan i la sauh sauh ang u.