Nellore district, Andhra Pradesh-a pa pakhat chuan damdawi ina fapa thi chu thawktuten a phurh hawna tur ambulance an pek theih loh avangin motorcycle-in a phur haw niin police officer-in a sawi.
Sangam khua, Kanigiri block-a Nilaini chawhnua thleng kha niin Buchireddypalem police inspector Ch Koteshwar Rao chuan Ningani khan thuthar lakhawmtute a hrilh.
Rao-a sawi dan chuan ni tin inhlawhfa, Dara Venkateshwarlu-a fapa kum riat mi, D Sriram leh naupang dang kum 10 mi, G Eshwar chu an in bul maia Kanigiri tuikawngah inthiar turin an kal a. An inthiar zawha tuikawng sira an kal chu tuiin a la a ni.
Sriram-a hi tui atanga an lak chhuah laiin a la thawh a, Eshwar-a erawh thiin an la chhuak a. Venkateshwarlu-a hian a motorcycle-in Kanigiri-a sorkar damdawi in a panpui a, a thi ve ta tho a ni.
Rao-a sawi dan chuan a fapa hi km hniha hla an khuaa phurhna tur ambulance ngaihtuahsak turin thawktute hi a ngen a; mahse, danin ruang phurh a khap avangin a theih loh niin an hrilh a. Ruang dahna tur an ngaihtuahsak thei lo bawk a, an bul hnaia autorickshaw khalhtuten an phurhsak duh lo bawk.
Venkateshwarlu-a beidawng chuan a motorcycle-in a phur haw ta a ni.
Rao-a chuan damdawi in thuneituten ruang phurhna tur an pe thei lo chu vanduaithlak a tih thu a sawi a. “Ambulance hi miin harsatna an tawh laia puihna tur a ni a. Autorickshaw-te pawhin vantlang mamawh an phuhru tur a ni,” tiin a khalhtute pawh hetianga ti tawh lo tur hian an ngen.
Telugu Desam Party (TDP) General Secretary Nara Lokesh pawhin Ningani khan he thil hi a sawi chhuak a, vanduaithlak a tih thu a sawi.
April 25 khan hetiang deuh bawk hian Sri Venkataramana Ramachandra Ruia Government Hospital, Tirupati khuaah ambulance khalhtuin km 90-a thui phurh nan Rs. 10,000 a phut a pek tur a neih loh avangin pa pakhatin a fapa ruang phurin a scooter-in a hawpui tawh bawk.